ԵՐԵՎԱՆ, 27 նոյեմբերի./Նովոստի–Արմենիա/. Փարիզը չի ճանաչում Լեռնային Ղարաբաղը, նշվում է հինգշաբթի ճեպազրույցի ժամանակ տարածված Ֆրանսիայի ԱԳՆ հայտարարության մեջ, հաղորդում է ՏԱՍՍ–ը։
Загружается новость ... "Лево"
«Նոյեմբերի 25–ին Սենատն ընդունել է բանաձև, որը կոչ է անում ֆրանսիական իշխանությունների կողմից ճանաչել ինքնահռչակ Լեռնային Ղարաբաղի Հանրապետությունը։ Քվեարկությանը նախորդած բանավեճերի ժամանակ ԱԳՆ–ին կից պետական քարտուղար Ժան–Բատիստ Լեմուանը հիշեցրել է այդ հարցի շուրջ ֆրանսիական կառավարության դիրքորոշումը։ Ֆրանսիան չի ճանաչում ինքնահռչակ Լեռնային Ղարաբաղի Հանրապետությունը», – նշվում է կոմյունիկեում։
Ֆրանսիայի Սենատը նախօրեին ձայների ճնշող մեծամասնությամբ ընդունեց Արցախի անկախության ճանաչման մասին բանաձև։ Փաստաթուղթն ընդունվել է 305 «կողմ» և 1 «դեմ» ձայներով։
Ֆրանսիայի Սենատի կողմից ընդունված բանաձևը ենթադրում է Արցախի անկախության ճանաչում, ինչը, ֆրանսիացի խորհրդարանականների կարծիքով, կապահովի տարածաշրջանում կայուն խաղաղության հաստատումը: Բացի այդ, բանաձևը Ֆրանսիայի կառավարությանը կոչ է անում դատապարտել Թուրքիայի հզոր աջակցությամբ Ադրբեջանի կողմից սանձազերծված ագրեսիան, և ազդել ադրբեջանական զորքերի անհապաղ դուրսբերման վրա այն տարածքներից, որոնք իրենց կողմից զբաղեցվել են ռազմական գործողությունների ընթացքում 2020 թ. սեպտեմբերի 27-ից:
Բանաձևը կոչ է անում նաեւ հետաքննել Արցախում կատարված պատերազմական հանցագործությունները, այդ թվում ՝ քաղաքացիական անձանց վրա հարձակումներն ու արգելված զենքի օգտագործումը, Թուրքիայի դեմ պատժամիջոցներ կիրառել:
Ըստ բանաձևի նախագծի, Ֆրանսիան պետք է ակտիվորեն աշխատի ԵԱՀԿ Մինսկի խմբի շրջանակներում `ապահովելու համար հայ բնակչության անվտանգությունը և տեղահանված քաղաքացիների վերադարձի իրավունքը` տրամադրելով լայնածավալ մարդասիրական օգնություն, ինչպես նաև նպաստելով հայկական մշակութային և կրոնական ժառանգության պահպանմանը:
Սենատի (Ֆրանսիայի խորհրդարանի վերին պալատ) բանաձևերը խորհրդատվական բնույթ են կրում, դրանք գործադիր իշխանությունը կարող է հաշվի առնել, բայց պարտավոր չէ կատարել դրանք:–0–