ԵՐԵՎԱՆ, 30 մարտի./Նովոստի–Արմենիա/. Ադրբեջանը ներխուժում է իրականացրել Ղարաբաղում ռուս–խաղաղապահ զորախմբի պատասխանատվության գոտի, հայտարարեց վարչապետ Նիկոլ Փաշինյանն այսօր կառավարության նիստի ընթացքում։
«Ադրբեջանը ոչ միայն շարունակել է ապօրինի արգելափակումը, այլ հերթական ներխուժումն է իրականացրել Լեռնային Ղարաբաղում ռուս–խաղաղապահ զորախմբի պատասխանատվության գոտի։ Դա արձանագրել է նաև ՌԴ ՊՆ–ն պաշտոնական հաղորդագորւթյամբ։ Այդ հաղորդագրության մեջ մասնավորապես ասվում է․ «2023 թվականի մարտի 25–ին Արդբեջանի զինված ուժերի ստորաբաժանումները խախտելով 2020 թվականի նոյեմբերի 9–ի եռակողմ հայտարարության առաջին կետը, Շուշիի շրջանում հատել են շփման գիծն ու զբաղեցրել 20/54 բարձունքն ու սկսել ինժեներական աշխատանքներ», – ասաց Փաշինյանը։
Նրա խոսքով, կարելի է արձանագրել, որ Ադրեբջանը ոչ միայն չի կատարում արդարադատության միջազգային դատարանի որոշումը, այլև ավելի է սրում իրավիճակը` Լեռնային Ղարաբաղի նաև ներքին տրանսպորտային հաղորդակցությունը արգելափակելուն ուղղված քայլեր ձենռարկելով։
Այսօր ավելի վաղ Արցախի ՆԳՆ–ն
հայտնեց, որ Ադրբեջանի զինուժն այսօր գիշեր փակել է Գորիս-Ստեփանակերտ մայրուղին` Աղավնո և Տեղ գյուղերի արանքում:–0–
