ԵՐԵՎԱՆ, 6 մայիսի. /Նովոստի–Արմենիա/. ՀՀ ԶՈՒ ԳՇ օպերատիվ վարչության պետ, գեներալ-մայոր Արտակ Դավթյանը կարծում է, որ ղարաբաղյան հակամարտության գոտում մոտ ժամանակներս լայնածավալ մարտական գործողություններ չեն սպասվում։
Հանրային ռադիոյին տված հարցազրույցում Դավթյանը նշել է, որ ղարաբաղա–ադրբեջանական սահմանագոտու ողջ երկայնքով հակառակորդի զինուժի կուտակումների ու ակտիվ տեղաշարժերի մասին լրատվամիջոցների և անհատ անձնանց կողմից շրջանառվող տեղեկատվությունը նախ և առաջ զարմացնում է հենց զինվորականներին։
«Քանի որ մենք ենք առաջին հերթին վերահսկում հակառակորդի շարժը, հետախուզություն վարում, գնահատում ենք այն ինչ որ կա, որպեսզի պատրաստ լինենք մարտական գործողություններ վարելուն, մեզ համար տարօրինակ են կուտակումների մասին տարածված տեղեկությունները: Այնպիսի տպավորություն է ստեղծվում, որ իրենք են գտնվում հետախուզական համակարգում և տեղեկատվություն են տարածում», – ասել է Դավթյանը
«Ստատուս Քվո» հաղորդման շրջանակում:
Իրականում, ըստ զինվորականի, այդ կուտակումները բնական են, և դրանց առկայությունը ամենևին չի նշանակում, որ վաղը կարող են լայնածավալ մարտական գործողություններ սկսվել:
«Դեպքերից հետո ինչպես մենք խմբավորումներ ծավալեցինք և պատրաստվեցինք մարտական գործողությունների, այնպես էլ Ադրբեջանի հանրապետության ԶՈՒ արեց ԼՂՀ սահմանների դիմաց՝ փորձելով կատարել որոշակի խնդիրներ: Այնպես որ այդ առումով կուտակումներ կան, և դա բնական է», – նշել է Դավթյանը։
Նրա խոսքով` մյուս կողմից այդ կուտակումները չեն նշանակում, որ վաղը սկսվելու են լայնածավալ մարտական գործողություններ: Յուրաքանչյուր կողմը՝ ինչպես հայկական, այնպես էլ ադրբեջանական, բնականաբար նախապատրաստական աշխատանքներ են կատարում, հաշվի առնելով իրավիճակի լարվածութունը, մյուս կողմից կողմերը ցույց են տալիս հակառակորդին խնդիրը կատարելու իրենց պատրաստակամությունը և վճռականությունը, որպեսզի քաղաքական գործընթացներ սկսելու դաշտ բացվի:
«Ես՝ որպես պաշտոնատար անձ, կարող եմ ասել մոտ ժամանակներս չեն սպասվում լայնածավալ մարտական գործողություններ: Միևնույն ժամանակ մենք ՝ որպես զինվորականներ, անգամ մինչև ապրիլյան դեպքերը, համարում ենք, որ ամեն օր կարող է պատերազմ սկսվել, և մենք պետք է պատրաստ լինենք դրան: Եվ այս դեպքերը նույնպես ցույց տվեցին, որ պատրաստ ենք նման խնդիրների կատարմանը»,- նշել է Դավթյանը։
Ապրիլի 2–ից 5–ն ադրբեջանական ԶՈՒ–ն ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։–0–
