Ղարաբաղի հարցում ադրբեջանական ծրագրերն ամբողջովին ձախողվեցին

ԵՐԵՎԱՆ, 4 ապրիլի./Նովոստի–Արմենիա/. Ղարաբաղի հարցում ադրբեջանական ծրագրերն ամբողջովին ձախողվեցին, երկուշաբթի ասաց ՀՀ պաշտպանության նախկին նախարար Վաղարշակ Հարությունյանը։

«Ադրբեջանի մշակած ծրագիրը ձախողվեց։ Պարզ երևում է, որ Բաքուն իր առջև չէր դրել լայնամասշտաբ պատերազմ սկսելու խնդիրը։ Հաշվի առնելով ներքին և արտաքին իրավիճակն` Ադրբեջանն իր առջև խնդիր էր դրել ապահովել իր համար շահավետ ռազմավարական դիրքեր շփման գծում», – նշեց նա։

Հարությունյանի խոսքով` եթե գնահատենք ուժերն ու նրանց թիվը, ապա պարզ է դառնում, որ Ադրբեջանն իր առջև խնդիր չէր դրել զավթելու Ղարաբաղը։ Այդ ուժերով կարելի է միայն փոխել իրավիճակը շփման գծում։

«Ի՞նչ ներքին խնդիր է լուծում Ադրբեջանը։ Այն ցույց է տալիս իր բնակչությանը, որ պաշտպանության համար նախատեսված ծախսերը զուր չէին։ Միաժամանակ Ադրբեջանը ցանկանում է բարձրացնել բանակի մարտական ոգին և մարտունակությունը», – նշեց նա։

Հարությունյանի խոսքով` արտաքին խնդիրների տեսակետից Ադրբեջանը հասկանում է, որ այսօրվա ռազմաքաղաքական հավասարակշռությունն իր կողմում չէ, իսկ բանակցային ճանապարհով Բաքուն պատրաստ չէ լուծել ղարաբաղյան հարցը։

Նրա խոսքով`Բաքուն շանտաժի է ենթարկում Ադրբեջանին, միջնորդներին և այն երկրներին, որոնք տարածաշրջանում ունեն տարբեր տնտեսական շահեր։

Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ`հրետանիով, զրահապատ տրանսպորտային միջոցներով և ավիացիայով:

ԼՂՀ ՊՆ–ի մամուլի ծառայության հաղորդմամբ` ապրիլի 3-ի լույս 4-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով հակառակորդը ականանետերից ու հրանոթներից շարունակել է արկակոծել ՊԲ առաջնային դիրքերն ու մերձակա հայկական բնակավայրերը։ Ադրբեջանական զորքերն առավոտյան ժամը 07:00-ի սահմաններում առավել ինտենսիվ հրետակոծություններ են սկսել շփման գոտու հարավարևելյան և հյուսիսարևելյան ուղղություններով։

Հակառակորդի ագրեսիվ գործողությունները ճնշելու ուղղությամբ ՊԲ առաջապահ ուժերը ձեռնարկում են բոլոր անհրաժեշտ միջոցները և վստահաբար իրականացնում իրենց առջև դրված մարտական խնդիրները։ Օպերատիվ տվյալներով` մարտական գործողությունների ընթացքում ոչնչացվել է 2 ուղղաթիռ, շուրջ 20 տանկ, «Գրադ» տիպի 1 կայանք, 5 միավոր այլ զրահատեխնիկա, այդ թվում` 1 ԲՄՊ, 1 միավոր ինժեներական տեխնիկա և 6 անօդաչու սարք։ Ադրբեջանական զինուժը տվել է 200-ից ավելի մարդկային կորուստ: Հայկական կողմը կորցրել է մեկ տանկ, ունի 18 զոհ, մոտ 40–ը վիրավոր է։ –0–