Հրապարակվել են կադրեր Կապանում տեղի ունեցած դաժան սպանության վայրից (ՎԻԴԵՈ)

ԵՐԵՎԱՆ, 14 դեկտեմբերի./Նովոստի–Արմենիա/. Հրապարակվել են կադրեր Կապանում տեղի ունեցած դաժան սպանության վայրից։

Ինչպես հաղորդում է ՀՀ ոստիկանությունը, դեկտեմբերի 13-ին, ժամը 18.50-ին, ոստիկանության Կապանի բաժնում ահազանգ է ստացվել, որ Կապանի Ստեփանյան փողոցի 8-րդ շենքի բնակարաններից մեկում սպանված մարդ կա:

Ահազանգով դեպքի վայր մեկնեցին օպերատիվ-քննչական խմբեր, փորձաքրեագետ ու դատաբժիշկ։ Բնակարնում հայտնաբերվեց 77-ամյա տանտիրուհու դին՝ բռնության ակնհայտ հետքերով: Տեղում ձեռնարկած օպերատիվ-հետախուզական միջոցառումների շնորհիվ Կապանի ոստիկանները պարզեցին կատարվածի մի շարք հանգամանքներ՝ բացահայտելով առանձնապես ծանր հանցագործությունը։

Ահազանգից մեկ ժամ անց կասկածանքով բաժին բերման ենթարկվեց սպանվածի 42-ամյա որդին, որը ներկայացվեց տարածքային քննչական մարմնին ու ձերբակալվեց:

Նշանակվել է դատաբժշկական փորձաքննություն։ Դեպքի հանգամանքներն ու շարժառիթը պարզվում են՝ սպանության հատկանիշներով հարուցված քրեական գործի նախաքննության շրջանակներում։

Քննչական կոմիտեի հաղորդմամբ, նախնական զննությամբ, բացի գլխի շրջանում առկա մարմնական վնասվածքներից արյունազեղման ձևով մարմնական վնասվածքներ են հայտնաբերվել նաև դիակի պարանոցի առաջային մակերեսին: Հարուցվել է քրեական գործ սպանության հատկանիշներով։–0–