ԵՐԵՎԱՆ, 5 սեպտեմբերի. /Նովոստի-Արմենիա/. Համաշխարհային ռոք-երաժշտության աստղերը երկուշաբթի կհավաքվեն Լոնդոնում կայանալիք բարեգործական աճուրդին, որը նվիրված է Queen բրիտանական խմբի լեգենդար մենակատար Ֆրեդի Մերքյուրիի հիշատակին, հաղորդում է «ՌԻԱ Նովոստին»:
Աճուրդը կանցկացվի Լոնդոնի Սթրենդ փողոցում գտնվող Savoy հյուրանոցում, որը վերջերս է վերանորոգվել: Աճուրդին կմասնակցեն Մերքյուրիի շուրջ 300 ընկերներն ու երկրպագուները: Մերքյուրին մահացել է ՁԻԱՀ-ի հետևանքով 1991 թ.-ին: Հյուրերի թվում կլինեն Queen-ի երաժիշտներ Ռոջեր Թեյլորն ու Բրայան Մեյը, դերասաններ Քրիս Էվանսը, Սթիվն Ֆրայը և Մեթ Լուկասը: Երեկույթը կվերածվի երգչի «նմանակների» շքերթի, քանի որ հրավիրվածներին խնդրել են կրել Մերքյուրիի ոճի հագուստ:
Աճուրդի ընթացքում վաճառքի կհանվեն 1992 թ.-ին կայացած համերգի ակուստիկ կիթառն ու We Will Rock You լոնդոնյան մյուզիքլի կազմում ընդգրկվելու հնարավորությունը, որի ընթացքում ներկայացվում են Queen խմբի երգերը:
Դերասան և խմբի երկրպագու Ռիզ Թոմասը հատուկ աճուրդի համար տեսահոլովակ է նկարահանել, որում ևս մեկ անգամ հիշեցնում է բրիտանացի երաժշտի տաղանդի և հումորի զգացումի մասին:
«Մենք ցանկանում էինք ցույց տալ Ֆրեդիի կյանքի լավագույն պահերը, նրա հումորը... Ֆրեդիի կենդանության օրոք Queen-ը երաժիշտների շրջանում ճանաչում չի վայլել՝ չնայած հանդիսատեսի շրջանում ձեռք բերած ապշեցուցիչ հաջողությանը: Սակայն Ֆրեդին ավելին էր, քան միայն ռոք-աստղ: Ջագերն ու Բոուին չէին կարողանա ծիծաղեցնել ձեզ այնպես, ինչպես Ֆրեդին: Նա ֆանտաստիկ կերպար է և բոլոր ժամանակների լավագույն ռոք-աստղը», - ասել է Թոմասը:
Բարեգորական երեկույթից ստացված ողջ հասութը կուղղվի «Mercury Phoenix Trust» ՄԻԱՎ/ՁԻԱՀ վարակակիրների հիմնադրամին, որը հիմնադրվել է 1992 թ.-ին Queen խմբի մասնակիցների կողմից:-0-
