Գիշերվա ընթացքում դեպի Իսրայելի տարածք ութ հրթիռ է բաց թողնվել, կան վիրավորներ. բանակ
Շաբաթ օրը պաղեստինյան գրոհայինների կողմից Գազայի հատվածից Իսրայելի Աշդոդ քաղաքի հրետակոծությունից նվազագույնը երեք մարդ ծանր վնասվածքներ է ստացել, «ՌԻԱ Նովոստիին» հաղորդել է Աշդոդի քաղաքապետարանի ԶԼՄ-ների հետ կապերի խորհրդական Իննա Շթեյնբերգը:
«Աշդոդի գերեզմանատան տարածքում երկու հրթիռ է ընկել՝ վնասելով երեք աշխատողի: Եվս մեկ հրթիռ է ընկել բաց տեղանքում՝ վնաս չպատճառելով»,- հայտնել է Շթեյնբերգը: Ինչպես հաղորդում է Իսրայելի Պաշտպանական բանակի մամուլի ծառայությունը, անցած գիշերվա ընթացքում դեպի Իսրայելի տարածք Գազայի հատվածից պաղեստինյան գրոհայինների կողմից ութ հրթիռ է բաց թողնվել:
Ի պատասխան հրթիռակոծության` Իսրայելի ՌՕՈՒ-ն մի շարք հարվածներ են հասցրել Գազայի հատվածի ուղղությամբ: «Ոչնչացված են մաքսանենգների երկու թունելները և զինապահեստը»,- «ՌԻԱ Նովոստիին» հայտնել է բանակի մամուլի ծառայության ներկայացուցիչը:
Գազայի հատվածից իսրայելական տարածքի ինտենսիվ հրթիռակոծությունները վերսկսվել են նախօրեին իսրայելական ՌՕՈՒ-ի կողմից «Ժողովրդական դիմադրության կոմիտեներ» խմբավորման առաջնորդներին ոչնչացնելուց հետո, ովքեր հինգշաբթի ցերեկը մի շարք հարձակումներ են կազմակերպել Իսրայելի հարավում: Էյլաթ հանգստավայրի տարածաշրջանի հարձակումների հետևանքով ութ մարդ է զոհվել, ավելի քան 30-ը վնասվածքներ են ստացել: -0-
