ԵՄ-ն դատապարտել է Սիրիայում ցուցարարների դեմ իրականացված «դաժան ռեպրեսիաները»

ԵՐԵՎԱՆ, 9 հուլիսի. /Նովոստի-Արմենիա/. Եվրամիությունը դատապարտում է Սիրիայում ցուցարարների դեմ «շարունակվող դաժան ռեպրեսիաները», հայտարարել է ԵՄ դիվանագիտության ղեկավար Քեթրին Էշթոնը, հաղորդում է «ՌԻԱ Նովոստին»:

Սիրիայում ուրբաթ կառավարական զորքերի և ցուցարարների միջև տեղի ունեցած հերթական բախումների հետևանքով զոհվել է 13 մարդ, ավելի վաղ տեղեկացրել է «Ռոյթեր» գործակալությունը՝ հղում անելով իրավապաշտպաններին:

«Ռեպրեսիաների և բռնության այս ուղին վարկաբեկում է Սիրիայի ղեկավարության խոստումները, նրա լեգիտիմությունն ու հավատարմությունը բարեփոխումներին: Դաժան ռեպրեսիաներն ու երկխոսությունն անհամատեղելի են», - նշվում է շաբաթ օրը «ՌԻԱ Նովոստի» գործակալություն ստացված Էշթոնի հայտարարության մեջ:

ԵՄ դիվանագիտության ղեկավարի խոսքերով՝ «իրական ազգային երկխոսությունը պետք է ամբողջովին ընդգրկի բոլոր կողմերին և ընթանա առանց վախի ու ահաբեկման»:

«Ընդդիմությունը պետք է առանցքային դեր խաղա այս երկխոսությունում», - նշել է Էշթոնը: Նա կոչ է արել Սիրիայի կառավարությանն անհապաղ ապահովել անկախ դիտորդների, միջազգային ԶԼՄ-ների ու հումանիտար կազմակերպությունների մուտքը երկիր:

Սիրիայում մարտի կեսերից բողոքի զանգվածային ակցիաներ են անցկացվում: Նրանք սկսվեցին երկրի հարավում գտնվող Դերաա քաղաքում և տեղափոխվեցին երկրի այլ շրջաններ: Ուրբաթ Սիրիայի մի քանի քաղաքներում կրկին բողոքներ են բռնկվել:

Անկարգությունների ավելի քան երեք ամիսների ընթացքում Սիրիայում անվտանգության ուժերի հետ բախումների հետևանքով, սիրիացի իրավապաշտպանների տվյալների համաձայն, զոհվել է ավելի քան 1,35 հազար մարդ: Իսկ պաշտոնական տվյալների համաձայն` իրադարձությունների սկզբից «զինված ահաբեկչական տարրերի» գործողությունների հետևանքով, որոնց վրա Սիրիայի իշխանությունները բարդում են երկրում բռնության պատասխանատվությունը, զոհվել է 340 զինծառայողներ և անվտանգության ուժերի ներկայացուցիչներ:-0-