ԵՐԵՎԱՆ, 8 հոկտեմբերի․ /Նովոստի-Արմենիա/․ Հավաքական անվտանգության պայմանագրի կազմակերպությունը ռազմական օգնություն կցուցաբերի Հայաստանին Լեռնային Ղարաբաղի հակամարտությունում՝ նրա տարածքային ամբողջականության իրական սպառնալիքի, կամ ուղղակի ռազմական հարձակման դեպքում, ասել է ՀԱՊԿ գլխավոր քարտուղար Ստանիսլավ Զասը:
«Պետք է հաշվի առնել երկու շեմ: Առաջինն այն է, երբ ՀԱՊԿ ցանկացած անդամ պետության անվտանգության, կայունության, ինքնիշխանության և տարածքային ամբողջականության իրական սպառնալիքներ են ստեղծվում: Այդ դեպքում այն իրավունք ունի դիմել ՀԱՊԿ-ին, ակտիվացվում է միջպետական խորհրդատվությունների մեխանիզմը, ներառյալ արտակարգ իրավիճակները, և նրա խնդրանքով անհրաժեշտ օգնություն կամ աջակցություն է ցուցաբերվում այս պետությանը», - հինգշաբթի լրագրողներին ասել Զասը, հաղորդում է «Ինտերֆաքս»-ը :
«Երկրորդ նման դեպքը ագրեսիայի դեպքում է, այսինքն՝ ռազմական հարձակումը: Սա համարվում է ագրեսիա մեր բոլոր պետությունների դեմ, և այս պարագայում մեր երկրի խնդրանքով ագրեսիայի օբյեկտին անմիջապես տրամադրվում է ամեն տեսակի օգնություն, այդ թվում նաև ռազմական: Նման դեպքերում գործարկվում է ՀԱՊԿ-ի պատասխանի ռեժիմը», - բացատրել է նա:
Զասը շեշտել է, որ ՀԱՊԿ կանոնադրությունը նախատեսում է համարժեք միջոցներ` նման անհրաժեշտության դեպքում իր մասնակիցներին օգնություն ցուցաբերելու համար: «ՀԱՊԿ ցանկացած անդամ պետություն իրավունք ունի հույս դնել օգնության վրա», - ասել է ՀԱՊԿ գլխավոր քարտուղարը:-0-
