ԵՐԵՎԱՆ, 14 նոյեմբերի./Նովոստի–Արմենիա/. Charlie Hebdo հայտնի ֆրանսիական սկանդալային ամսագիրն իր հերթական հրապարակումը նվիրել է հայ–ադրբեջանական հակամարտությանը Ղարաբաղում ռազմական սրացման համատեքստում։
Charlie Hebdo–ում հրապարակված հոդվածը կոչվում է «Հայաստան–Ադրբեջան. մի ծիծաղեք, Լեռնային Ղարաբաղը մեր մասին է»։
Ինչպես գրում է ամսաիգրը, Լեռնային Ղարաբաղի հայերը հայտնվել են ծուղակում` սեղմված լինելով ռազմատենչ և վրիժառու Թուրքիայի և նույնքան ռազմատենչ ու էքսպանսիոնիստ Ադրբեջանի միջև։ Տպավորություն է ստեղծվում, թե եվրոպական ժողովրդավարությունը մոռացել է նրանց մասին։
Հրատարակությունը միանշանակ կողմ է Հայաստանի և հայ ժողովրդի իրավունքին` ապրել առանց մշտական դիմակայության թուրք–ադրբեջանական շրջափակմանը, առանց ռազմական հարձակման հեռանկարների և գոյութենական սպառնալիքի։
Նշվում է, որ Հայաստանում և հայկական սփյուռքում նոր ցեղասպանության մտավախություն ունեն։ Հրատարակությունը հիշեցնում է, որ Բաքուն ցանկանում է վերադարձնել Լեռնային Ղարաբաղի տարածքը` չսպասելով խաղաղ կարգավորման ԵԱՀԿ–ի հովանու ներքո բանակցությունների միջոցով։
Ամսագրի կարծիքով, Ադրբեջանը, ցանկանալով վերադարձնել 95%–ով հայերով բնակեցված Ղարաբաղը, կատարում է Էրդողանի` նեոօսմանյան կայսրության ստեղծմանն ուղղված ռազմական խնդիրը, որը հիմնված է ոչ լիբերալ ժողովրդավարության, ազգայնամոլության վրա։ Դա հակասում է եվրոպական հիմնարար արժեքներին` հանդուրժողականությանը, բազմակարծությանն ու փոքրամասնությունների իրավունքները հարգելուն։
Charlie Hebdo–ն հարցադրում է անում Լեռնային Ղարաբաղի հետագա ճակատագրի մասին։
«Մեզ անհրաժեշտ է ճանաչել Ղարաբաղի անկախությունը հիմա՞, թե՞ սպասել ժողովրդավարական քվեարկության ԵԱՀԿ–ի վերահսկողության ներքո։ Դիվանագիտությունն ու միջազգային իրավունքը հակվում են երկրորդին, իրատեսությունն ու խիղճն` առաջինին», – նշվում է հոդվածում։
Հրապարակման վերջում կոչ է արվում եվրոպական ժողովրդավարությանը պաշտպանել Լեռնային Ղարաբաղը. «150 հազար մարդ պարզապես ցանկանում է, որ իրենց չբնաջնջեն երկրի երեսից»։–0–
