Անցորդը բռնել է իններորդ հարկից ընկնող կնոջը (ՎԻԴԵՈ)

ԵՐԵՎԱՆ, 21 նոյեմբերի. /Նովոստի–Արմենիա/. Չիլիում Հաիթիի ներգաղթյալը փորձել է փրկել բազմահարկ շենքից ընկնող կնոջը։

Այդ մասին, ինչպես գրում է Lenta.ru–ն, հայտնում է Daily Mail–ը։

Կինը կախված էր տան պատից` բռնված իններորդ հարկի պատշգամբի բազկից։ Պարբերականը չի նշում, թե ինչպես է կինը հայտնվել այդպիսի իրավիճակում։ Ներքևում հավաքվածները նկարահանում էին այդ ամենը հեռախոսներով։


Հաիթիից երեք տարի առաջ Չիլի տեղափոխված Ռիչարդ Ջոզեֆը ավտոբուսից դուրս գալիս տեսել է կնոջը։

«Սկզբում ես հանեցի հեռախոսը և սկսեցի նկարել մյուսների պես։ Հետո հասկացա, որ դա այդքան էլ հարմար պահ չէ։ Այդ պահին սկսեցի մտածել, թե ինչպես նրան օգնեմ,– պատմում է նա։ – Ես որոշեցի մեղմել նրա ընկնելը։ Չէի կարծում, որ իրականում կփրկեմ նրան, բայց ուզում էի, որ գլխով չհարվածի հողին»։

Ջոզեֆը մոտավոր հաշվարկել է, թե ուր կարող է ընկնել կինը, կանգնել է այդ մասում և մեկնել ձեռքերը։ Իսկ կինը, պոկվելով, ընկել է անմիջապես նրա վրա։ Երկուսն էլ վնասվածքներ են ստացել, բայց ողջ են մնացել։ Կնոջը տեղափոխել են հիվանդանոց ծանր վիճակում, հաիթացին վնասել է ծունկը, ոտնաթաթը և ձեռքը։

Չիլիացի բարերար Լեոնարդո Ֆարկասը խոստացել է Ջոզեֆի բուժմանը երկու միլիոն չիլիական պեսո հատկացնել։ -0-