«Թալիբան» շարժումը հայտարարեց Աֆղանստանի ամբողջ տարածքը վերահսկելու մասին

ԵՐԵՎԱՆ, 15 օգոստոսի․/Նովոստի-Արմենիա/․ «Թալիբան» արմատական շարժումը (արգելված է ՌԴ-ում) այսօր հայտարարեց, որ վերահսկում է Աֆղանստանի ամբողջ տարածքը, գրում է ՏԱՍՍ-ը՝ հղում անելով Al Arabiya հեռուստաալիքին։

Թալիբների հայտարարության մեջ, որը մեջբերում է հեռուստաալիքը, նշվում է, որ «երկրի մայրաքաղաքում ռազմական գործողություններ չեն իրականացվում, շարժումը վերահսկում է Աֆղանստանի ամբողջ տարածքը»։

Հեռուստաալիքի տվյալներով, «Թալիբանը» նաև իր վերահսկողության տակ է առել Քաբուլից հյուսիս-արևմուտք գտնվող Բահրամ ավիաբազան (Փարվան նահանգ)։ Ինչպես հաղորդում է Al Arabiya հեռուստաալիքը, խմբավորումը նաև գրավել է Բահրամ քաղաքում գտնվող բանտը, որտեղ պահվում է մոտ 5 հազար բանտարկյալ, և ազատ է արձակել իր կողմնակիցներին։ Բահրամ ավիաբազան օգտագործում էին խորհրդային զորքերը Աֆղանստանի պատերազմի ընթացքում (1979-1989), իսկ 2001թ-ից՝ ԱՄՆ-ի ներխուժումից հետո, ամերիկացի զինվորականները։

Կիրակի առավոտյան շարժման ուժերը բոլոր ուղղություններով հարձակվել են Քաբուլի վրա։ Աֆղանստանի ներքին գործերի նախարարի պաշտոնակատար Աբդուլ Սաթար Միրզաքվալը Tolo News հեռուստաալիքի եթերում հայտարարել է, որ «իշխանության փոխանցումը տեղի կունենա խաղաղ»։

Ունեցած տվյալներով, աֆղանական գործող կառավարությունից անցումային շրջանի վարչակազմին իշխանության փոխանցումը տեղի կունենա այսօր Քաբուլում գտնվող նախագահական պալատում։-0-