ԵՐԵՎԱՆ, 18 հոկտեմբերի./Նովոստի–Արմենիա/. Պաղեստինի առողջապահության նախարարությունը պնդում է, որ իսրայելական բանակը հարձակվել է Գազայի հատվածի կենտրոնական մասում գտնվող Ալ Ահլի հիվանդանոցի վրա։
Ինչպես հայտնում է
BBC–ին, պաղեստինյան աղբյուրների տվյալներով՝ զոհվել է ավելի քան 500 մարդ։ Իսրայելցի զինվորականները հայտնել են, որ հիվանդանոցի ողբերգության պատճառը պաղեստինյան «Իսլամական ջիհադ» խմբավորման հրթիռներն են:
BBC-ի Մերձավոր Արևելքի թղթակից Թոմ Բեյթմանը, վկայակոչելով տեղի բնակիչներին, հայտնում է, որ հարյուրավոր ներքին տեղահանվածներ էին պատսպարվել հիվանդանոցի տարածքում:
Հարձակումից հետո դրսում, փլատակների տակ կան դիեր և ավերված մեքենաներ։
Բրիտանացի-պաղեստինցի վիրաբույժ, պրոֆեսոր Ղասսան Աբու Սիտան նշել է, որ հիվանդանոցում վիրահատություն էր կատարում, երբ տեղի է ունեցել ավիահարվածը:
Բժշկի խոսքով, հիվանդանոցի մի մասը հրդեհվել է։ Գազայի հատվածի պաշտոնյաներն արդեն մեղադրել են իսրայելական զինվորականներին ավիահարվածի համար և հայտնել առնվազն 500 մարդու մահվան մասին:
Իսրայելի պաշտպանության բանակն իր հերթին հայտնել է, որ, իրենց տվյալներով, Ալ Ահլի հիվանդանոցն ավերվել է «Իսլամական ջիհադ» խմբավորման կողմից արձակված հրթիռի հետևանքով:
Բացի այդ, Իսրայելի պաշտպանության ուժերը հրապարակել են գծապատկեր, որը ցույց է տալիս ռադարի կողմից ֆիքսված հրթիռների հետագիծը, որոնք արձակվել են Գազայից։ Ալ Ահլի հիվանդանոցը, ըստ գծապատկերի, գտնվում է հետագծի տակ կամ մի փոքր այն կողմ։
Պաղեստինյան «Իսլամական ջիհադ» կազմակերպությունը հերքել է մեղադրանքները։ Իսրայելի վարչապետ Բենիամին Նեթանյահուն հայտարարել է, որ Ալ Ահլի հիվանդանոցում տեղի ունեցած պայթյունի մեղավորը «բարբարոս ահաբեկիչներն» են։
«Գազայում ահաբեկիչների հետ անցած հակամարտություններից մենք գիտենք, որ մեր ուղղությամբ արձակվող հրթիռների մոտ 33%-ը չեն հասնում իրենց թիրախին և ընկնում են Գազայում», - BBC-ին ասել է Իսրայելի վարչապետի խորհրդական Մարկ Ռեգևը:
Ալ Ահլի հիվանդանոցում պայթյունից հետո Պաղեստինի աջակիցները փողոցային ցույցեր են կազմակերպել տարածաշրջանի շատ երկրներում, ինչպես նաև Եվրոպայում։ Հարյուրավոր մարդիկ դուրս են եկել Հորդանան գետի արևմտյան ափին գտնվող Ռամալլա քաղաքի փողոցներ։
Թուրքիայում և Լիբանանում ևս հազարավոր մարդիկ ցույցեր են կազմակերպել Իսրայելի և ԱՄՆ դեսպանատների մոտ։ Անկարայում ոստիկանությունը ցուցարարներին ցրել է ջրցան մեքենաների միջոցով, Բեյրութում արցունքաբեր գազ է կիրառվել։
Թունիսում ցուցարարները հավաքվել են Ֆրանսիայի և Մեծ Բրիտանիայի դեսպանատների մոտ։ Եվրոպական բազմաթիվ քաղաքներում ևս ցույցեր են կազմակերպել։–0–
Պաղեստինցի լրագրողը ֆիքսել է հիվանդանոցի վրա հարձակման պահը
