Կորոնավիրուսի նոր շտամ է հայտնաբերվել, այն կայուն է պատվաստանյութերի նկատմամբ
ԵՐԵՎԱՆ, 6 սեպտեմբերի./Նովոստի–Արմենիա/. ԱՀԿ–ն հայտնել է կորոնավիրուսի նոր շտամի հայտնաբերման մասին, որն առաջին անգամ մուտացիայի է ենթարկվել Կոլումբիայում։ Այն անվանել են «Մյու» (μ) կամ B.1.621, գրում է medikforum.ru–ն։
Մինչ այժմ ԱՀԿ–ն առանձնացրել էր կորոնավիրուսի չորս շտամ («ալֆա», «բետա», «լյամբդա», «դելտա»), որոնք «մտահոգություն են առաջացնում»։
«Կորոնավիրուսի նոր` «մյու» տարբերակը բնութագրվում է որպես «մուտացիաների ամբողջություն», և վաղ ուսումնասիրությունները ցույց են տվել, որ շտամը նույնքան կայուն է պատվաստանյութերի նկատմամբ, որքան Հարավային Աֆրիկայում առաջացած բետա տարբերակը», – գրում է Express հրատարակությունը (Մեծ Բրիտանիա)։
«Մյու» մուտացիան առաջին անգամ հայտնաբերվել է 2021թ.–ի հունվարին։ ԱՀԿ–ի տվյալներով, դրանից հետո ստացվել են Հարավային Ամերիկայում դեպքերի աճի և բռնկման եզակի տեղեկություններ։ «Մյու» շտամը սկսել է «ճամփորդել» Եվրոպայում։ Օրինակ Մեծ Բրիտանիայում այս պահին գրանցվել է վարակման 55 դեպք, և վարակման թիվը դանդաղ, բայց անշեղորեն աճում է։ «Մյու» տարբերակը Հարավային Ամերիկայից տարածվել է աշխարհի 39 երկրում, այդ թվում` ԱՄՆ–ում, որտեղ այսօր դրա պատճառով գրանցվում է հիվանդացածների կտրուկ աճ։
«Մյու» շտամի մուտացիաների քանակը թույլ է տալիս գիտնականներին եզրակացնել, որ այն կարող է նվազեցնել պատվաստանյութերի արդյունավետությունը։ Ավելին, ԱՀԿ–ի նախնական տվյալներն իսկապես գրանցել են այնպիսի նվազում, «ինչպիսին բետա տարբերակի դեպքում է»։
ԱՀԿ–ն հիշեցնում է, որ բոլոր վիրուսները ժամանակի ընթացքում ենթարկվում են մուտացիայի, այդ թվում` SARS-CoV-2–ը, որն առաջացնում է COVID-19–ը հիվանդությունը, սակայն այդ մուտացիաների մեծ մասը գրեթե չի ազդում վիրուսի փոխանցման արագության, ինչպես նաև պատվաստանյութերի նկատմամբ դրա կայունության վրա։ Միաժամանակ, պրակտիկան ցույց է տալիս, որ կորոնավիրուսի որոշ մուտացիոն տարբերակների վրա այս կանոնը չի տարածվում։ Մասնավորապես, կորոնավիրուսի դելտա տարբերակը, որն առավել տրանսմիսիոն (շարժահաղորդ) շտամերից մեկն է, առաջացրել է ինֆեկցիայի լայն տարածում այնպիսի երկներում, որոնք թվում էր, թե ի վիճակի են զսպել վիրուսի տարածումը վաղ արգելափակման և այլ միջոցների օգնությամբ։
Դեռևս վաղ է խոսել այն մասին, որ «մյու» շտամը կլինի դելտայից ավելի քիչ կամ ավելի շատ ագրեսիվ։ Բայց ԱՀԿ–ն մտահոգված է Կոլումբիայում և Էկվադորում «մյու» շտամի տարածման կապակցությամբ, այնտեղ հիվանդացությունն անշեղորեն ավելանում է։ Ձեռնպահ մնալով կանխատեսումներից` փորձագետները նշում են, որ անհրաժեշտ են լրացուցիչ հետազոտություններ, որոնք կօգնեն ավելի հստակ կողմնորոշվել նոր շտամի վնասակարության ներուժի հարցում։–0–
