ԵՐԵՎԱՆ, 17 փետրվարի./Նովոստի–Արմենիա/. Չինաստանի Չժեզցյան նահանգի Թայչժոու քաղաքում սկսվել է մահացու կորոնավիրուսի առաջին հնարավոր դեղամիջոցի արտադրությունը։
Այս մասին հաղորդում է
lenta.ru–ն` հղում անելով Baijiahao ինտերնետ հարթակին, որն էլ իր հերթին հղում է անում քաղաքի իշխանություններին։
Խոսքը Favipiravir դեղամիջոցի մասին է, որը չիներեն ստացել է 法维拉韦 անվանումը («Ֆավեյլավեյ»)։
Դեղամիջոցն արտադրող ընկերությունը ստացել է պաշտոնական հավանություն անհրաժեշտ վերահսկող մարմիններից։ Նշվում է, որ այն կարող է դառնալ առաջին դեղամիջոցը, որը կօգնի կորոնավիրուսի դեպքում։
Փետրվարի սկզբին ԱՀԿ–ի` արտակարգ ծրագրերի գծով գործադիր տնօրեն Մայքլ Ռայանը նշել էր, որ հիմա աշխարհում չկա գործուն դեղամիջոց չինական կորոնավիրուսի դեմ։ Մասնագետի խոսքով, ՄԻԱՎ–ի կամ կորոնավիրուսի նախկին տեսակների համար օգտագործվող դեղերի արդյունավետությունը նոր վիրուսի դեպքում ապացուցված չէ։
Ավելի վաղ հայտնի է դարձել, որ Չինաստանում փորձարկում են «Տրիազավիրին» ռուսական արտադրության դեղամիջոցը։ Այն վաճառքի է հանվել ռուսական դեղատներում 2014թ.–ին։ Vademecum դեղագործական ոլորտը լուսաբանող ամսագրի տվյալներով, դեղամիջոցն արդյունավետ է գրիպի վիրուսի 15 շտամերի դեմ։
Վերջին տվյալներով, Չինաստանում կորոնավիրուսով հիվանդացած մարդկանց թիվը գերազանցել է 69,2 հազարը, մահացել է 1670 մարդ։ Կորոնավիրուսի բռնկումն առաջին անգամ գրանցվել է Չինաստանի Ուհան քաղաքում 2019թ.–ի դեկտեմբերի վերջին։ Չինաստանից բացի, հիվանդացության դեպքեր են գրանցվել ավելի քան 20 երկրներում։ ԱՀԿ–ն արդեն նշել է, որ կորոնավիրուսի բռնկումը միջազգային նշանակության արտակարգ դրություն է։ Մասնագետները չեն բացառում, որ վիրուսի բռնկումը կարող է վերածվել լայնամասշտաբ համաճարակի։–0–