ԵՐԵՎԱՆ, 11 նոյեմբերի. /Նովոստի–Արմենիա/. ԱՄՆ նախագահ Բարաք Օբաման դարձել է գործող առաջին նախագահը, ում լուսանկարը հայտնվել է համասեռամոլների համար նախատեսված ամսագրի շապիկին։
Նրա լուսանկարը հրապարակվել է OUT ամսագրում, որը մասնագիտանում է համասեռամոլների նորաձևության և ոճի ոլորտում, գրում է The Washington Times–ը։
Օբամայի լուսանկարի վրա գրված է. «Մեր նախագահը», իսկ ներքևում` երեք բառ. «Դաշնակից. Հերոս.Կուռք»։
Հրատարակության բնութագրմամբ` սա «պատմական պահ է պատմական տարում»։ Հենց 2015 թ.–ին է ԱՄՆ Գերագույն դատարանը վճռել, որ միասեռ ամուսնություններն օրինական են երկրի ողջ տարածքում, հաղորդում է lenta.ru–ն։
Հրատարակության համար տված հարցազրույցում Օբաման հայտարարել է, որ նա նախագահ է դարձել, որպեսզի «կատարի մեր խոստումը, որ մենք բոլորս հավասար ենք ստեղծված, և ոչ ոք չպետք է օտարացած լինի ամերիկյան երազանցիք միայն իր կողմնորոշման պատճառով»։
ԱՄՆ նախագահն առանձնահատուկ նշել է իր պրոֆեսորներից մեկին` Լոուրենս Գոլդինին (Lawrence Goldyn), ով դասավանդել է Լոս Անջելեսի Արևմտյան քոլեջում։ Օբաման ընդգծել է, որ Գոլդինն իր կյանքում հանդիպած ամենաազդեցիկ համասեռամոլներից է։
«Ես, կարծես, 18 տարեկան էի, Լոուրենսն այն ժամանակ քոլեջի ամենաերիտասարդ պրոֆեսորներից էր, և մենք լավ ընկերներ դարձանք», – նշել է Օբաման։ «Նա ընտրել էր այդ ուղին` Արևմտյան քոլեջում ուսանող լեսբուհիներին, համասեռամոլներին և տրանսսեքսուլաներին խորհուրդներ տալու համար, և հաշվի առեք, որ դա 1978 թվականն էր», – նշել է Օբաման։ Նրա խոսքով` նման դիրքորոշումը «մեծ խիզախություն է» պահանջում։
«Օբամայի նախագահության օրոք միասեռ ամուսնությունների գրանցումը ԱՄՆ–ի քաղաքացու սահմանադրական իրավունք է ճանաչվել։ Հունիսի 26–ին ԱՄՆ–ի Գերագույն դատարանն օրինականացրել է միասեռ ամուսնությունների գրանցումը երկրի ողջ տարածքում։ –0–