TRIPP–ի տնտեսական էֆեկտը Հայաստանի համար սահմանափակ կլինի․ Դավիթ Անանյան
ԵՐԵՎԱՆ, 17 փետրվարի․/Նովոստի–Արմենիա/․ TRIPP («Թրամփի ուղի՝ հանուն միջազգային խաղաղության և բարօրության») նախագծի տնտեսական էֆեկտը, Հայաստանի վրա կլինի սահմանափակ։ Այս մասին հայտարարել է «Միասնության թևեր» նախաձեռնության համահիմնադիր, տնտեսական թիմի ղեկավար Դավիթ Անանյանը։
Երեքշաբթի կայացած մամուլի ասուլիսում, որը նվիրված էր նախաձեռնության նոր տնտեսական մոդելի ներկայացմանը, Անանյանը հայտնեց, որ կատարվել են նախնական հաշվարկներ՝ հիմնվելով միջազգային լրատվամիջոցների տեղեկատվության վրա։
Նրա խոսքով՝ նախնական փուլում քննարկվել է 43 կմ երկարությամբ էստակադային հատվածի կառուցումը՝ առանց Հայաստանի գործող տրանսպորտային-հաղորդակցային ենթակառուցվածքների հետ ինտեգրման։
Անանյանը նշեց, որ համաշխարհային պրակտիկայում տարանցիկ փոխադրումներից ստացվող եկամուտները հաշվարկվում են՝ ելնելով փոխադրվող բեռների տոննաժից։
«Մեր դեպքում խոսքը մեկ տոննայի դիմաց 5-ից 7 դոլար սակագնի մասին է։ Ի սկզբանե գնահատվում էր 10-ից 15 միլիոն տոննա փոխադրելու հնարավորությունը, իսկ լավատեսական սցենարով՝ մինչև 20 միլիոն տոննա։ Մեկ տոննայի դիմաց 7 դոլար սակագնի դեպքում դա կազմում է շուրջ 140 միլիոն դոլար», — ասաց նա։
Ըստ նրա՝ Հայաստանի 26% մասնաբաժնի դեպքում պոտենցիալ տարեկան եկամուտը կարող է կազմել մի քանի տասնյակ միլիոն դոլար։
«TRIPP-ը Հայաստանի համար զգալի տնտեսական հնարավորություններ չի ստեղծի, սակայն դրա քաղաքական-դիվանագիտական նշանակությունը կարող է կարևոր լինել։ Նախագիծը կարող է հարթակ դառնալ Իրանի, Չինաստանի, Հնդկաստանի, Ռուսաստանի և ԱՄՆ-ի շահերի համաձայնեցման համար», — հայտարարեց Անանյանը։
