ԵՐԵՎԱՆ, 20 ապրիլի. /Նովոստի–Արմենիա/. Forbes–ի ռուսական խմբագրությունը հինգշաբթի հրապարակել է Ռուսաստանի 200 ամենահարուստ ձեռներեցների 14–րդ
վարկանիշը, որտեղ ներառվել է հայազգի 7 գործարար։
«Մագնիտ» մանրածախ ցանցի հիմնական բաժնետեր և գլխավոր տնօրեն Սերգեյ Գալիցկին (Հարությունյան) զբաղեցրել է վարկանիշի 18–րդ տեղը, նրա ունեցվածքը գնահատվել է 6,8 մլրդ դոլար։ «Տաշիր» ընկերությունների խմբի նախագահ և հիմնադիր Սամվել Կարապետյանը 32–րդն է, նրա ունեցվածքը գնահատվում է 3,4 մլրդ դոլար։ Վարկանիշի 48–րդ հորիզոնականում է «Ռոսգոսստրախ» ընկերությունների նախագահ Դանիլ Խաչատուրովը` 2 մլրդ դոլար։
Ռուսական սոցիալական ձեռներեցության առաջատարներից մեկը` ներդրումային բանկիր և բարերար Ռուբեն Վարդանյանը զբաղեցրել է 99–րդ հորիզոնականը, նրա ունեցվածքը գնահատվում է 950 մլն դոլար, իսկ ցանկի 123–րդ տեղում է Wooden Fish Agency ընկերության դիտորդական խորհրդի ղեկավար Ալբերտ Ավդոլյանը, ում ունեցվածքը գնահատվում է 800 մլն դոլար։
Եղբայրներ Նիկոլայ և Սերգեյ Սարկիսովները («ՌԵՍՈ–Գարանտիա») 700–ական միլիոն դոլարով զբաղեցրել են վարկանիշի համապատասխանաբար 146 և 147–րդ հորիզոնականները։
200 ամենահարուստ գործարարների համախառն ունեցվածքը մեկ տարվա ընթացքում աճել է 100 մլրդ դոլարով` մինչև 460 մլրդ դոլար։ Դոլարային միլիարդատերերի թիվն ավելացել է` 77–ից հասնելով 96–ի։ Հատման շեմը ևս աճել է` նախորդ տարի գրանցված 350 մլն դոլարից հասնելով 500 մլն դոլարի։
Forbes–ի ցանկում ներառվելու «մուտքի տոմսը» երբևիցե այսքան թանկ չի արժեցել։ Վարկանիշի առաջին տասնյակում հայտնվելու համար գործարարը պետք է ունենա 12,4 մլրդ դոլար, մեկ տարի առաջ այդ ցուցանիշը կազմում էր 8,7 մլրդ դոլար։
Ցանկը երկրորդ տարին անընդմեջ գլխավորում է Ռուսաստանի խոշորագույն գազ արդյունահանող մասնավոր ընկերության` «Նովատեկի» համահիմնադիր Լեոնիդ Միխելսոնը։ Նրա ունեցվածքը Forbes–ը գնահատել է 18,4 մլրդ դոլար։
Երկրորդ տեղը զբաղեցրել է «Սեվերստալի» սեփականատեր Ալեքսեյ Մորդաշովը, նրա ունեցվածքը գնահատվել է 17,5 մլրդ դոլար։ Երրորդը Նովոլիպեցկի մետաղագործական կոմբինատի սեփականատեր Վլադիմիր Լիսինն է, ում ունեցվածքը գնահատվում է 16,1 մլրդ դոլար։–0–
