Հայ բեռնափոխադրողները մտահոգված են ձյան պատճառով «Վերին Լարս» հսկիչ անցակետի աշխատանքի սահմանափակումներով
Հայ բեռնափոխադրողներից կազմված պատվիրակությունը երեքշաբթի ՀՀ տրանսպորտի և կապի նախարար Մանուկ Վարդանյանի հետ տեղի ունեցած հանդիպման ժամանակ մտահոգություն է հայտնել ռուս-վրացական սահմանին գտնվող «Վերին Լարս» հսկիչ անցակետում երթևեկության հետ կապված խնդիրների կապակցությամբ:
ՀՀ տրանսպորտի և կապի նախարարության մամուլի ծառայության տեղեկատվության համաձայն՝ Վարդանյանը խոստացել է հարցը բարձրացնել վրացի գործընկերների առջև և համատեղ ուժերով փորձել լուծել խնդիրը:
Ըստ գերատեսչության տվյալների, Վրաստանի ճանապարհային դեպարտամենտից ստացված տեղեկատվության համաձայն, վերջին 10 օրերին ձյան առատ տեղումների և սառցակալման հետևանքով Մցխեթա-Ստեփանծմինդա-Լարսի ճանապարհի Գուդաուրի (Պոստա)-Կոբի հատվածում երթևեկությունն արգելված է տրեյլերների, կիսատրեյլերների և 30-ից ավելի նստատեղ ունեցող ավտոբուսների համար:
Այլ մեքենաների համար երթևեկությունը թույլատրվում է հակատեղապտույտային շղթաների առկայության պարագայում: Երկու տանող կամրջակներով մեքենաների համար երթևեկությունը բաց է: Նշված ճանապարհահատվածում մեքենաները կշարժվեն թունելներով`ձնահոսքերից պաշտպանվելու նպատակով: Ճանապարհի այլ հատվածներում երթևեկությունը բաց է:
«Վերին Լարս» հսկիչ անցակետը, որը գտնվում է Ռուսաստանի և Վրաստանի սահմանի վրա, ապահովում է Հայաստանի և Ռուսաստանի միջև միակ ուղիղ վերերկրյա տրանսպորտային կապը: Թուրքիայի և Ադրբեջանի կողմից Հայաստանի շրջափակման պայմաններում «Վերին Լարսը» կարևոր դեր է խաղում արտաքին աշխարհի հետ հանրապետության տնտեսական կապերի պահպանման գործում:-0-
