Երևանում կնշեն մեծանուն նկարիչ Մարտիրոս Սարյանի 135-ամյակը

ԵՐԵՎԱՆ, 27 փետրվարի. /Նովոստի–Արմենիա/. Երևանում փետրվարի 28-ին կնշեն մեծանուն նկարիչ Մարտիրոս Սարյանի 135-ամյակը, հայտնում է ՀՀ մշակույթի նախարարության մամուլի ծառայությունը։

Ինչպես նշված է հաղորդագրության մեջ, փետրվարի 28-ին ժամը 12:00-ին Մարտիրոս Սարյանի արձանի մոտ կհավաքվեն վարպետի հարազատները, մտավորականներ, արվեստագետներ՝ ՀՀ մշակույթի նախարարի տեղակալ Արև Սամուելյանի գլխավորությամբ:

Այնուհետև ժամը 12:30-ից ներկաները կշարժվեն դեպի Կոմիտասի անվան պանթեոն՝ հարգանքի տուրք մատուցելու և խնկարկելու մեծ արվեստագետի հիշատակը:

Մարտիրոս Սարյանը (1880 թվականի փետրվարի 28 (16) – 1972 թվականի մայիսի 5) ծնվել է Նոր Նախիջևանում։ Սովորել է Մոսկվայի Գեղանկարչության, քանդակագործության և ճարտարապետության ուսումնարանի գեղանկարչության բաժնում։

Հայաստանում խորհրդային կարգերի հաստատումից հետո Սարյանը 1921-ին ընտանիքով տեղափոխվել և մշտական բնակություն է հաստատել Երևանում, որտեղ էլ 1972 թ-ի մայիսի 5-ին վախճանվել է։ Թաղված է Երևանի Կոմիտասի անվան պանթեոնում։ 1967-ին Երևանում բացվել է Սարյանի տուն-թանգարանը, ուր գտնվում է նրա ստեղծագործական ժառանգության մի զգալի մասը։ Սարյանի գործերը կենտրոնացված են Հայաստանի պետական պատկերասրահում և նրա մասնաճյուղերում, ինչպես և Տրետյակովյան պատկերասրահում, ԱՊՀ երկրների տարբեր թանգարաններում, ԱՄՆ-ի, Ֆրանսիայի և այլ երկրների մասնավոր հավաքածուներում։-0-