ԵՐԵՎԱՆ, 19 նոյեմբերի. /Նովոստի–Արմենիա/. «Ռեժիսորներ առանց սահմանների» նախագծի շրջանակում իրականացված եռամյա ծրագրի նպատակը երիտասարդ կինոգործիչներին օժանդակելն է, «Նովոստի–Արմենիա» գործակալությանն ասաց «Ոսկե ծիրան» փառատոնի գեղարվեստական տնօրեն Սուսաննա Հարությունյանը։
««Ռեժիսորներ առանց սահմանների» նախագիծը գիտելիք ստանալու և տեղեկություն փոխանակելու հարթակ է»,– ասաց Հարությունյանը։ Նրա խոսքով` եռամյա ծրագիրը, որը ֆինանսավորել է Եվրոպական միությունը 2011 թվականին, մի շարք կետերից է բաղկացած։
Առաջինը վերաբերում է հենց կայքէջին (dabhub.com), որը երեք տարի շարունակ առցանց հարթակ է հանդիսանում ավելի քան 600 օգտատերերի` ռեժիսորների, պրոդյուսերների և «Արևելյան գործընկերության» երկրների (Հայաստան, Վրաստան, Ուկրաինա, Ադրբեջան, Բելառուս և Մոլդովա) կինոգործիչների համար։ Հարությունյանը նշեց, որ կայքում տարատեսակ նորություններ են թողարկվում։
Նախագծի երկրորդ կետը վերաբերում է Երևանում, Կիևում և Թբիլիսիում վորքշոփերի կազմակերպմանը. Նախագծի շրջանակում շուրջ 89 ռեժիսոր է մասնակցել դասընթացներին։ «Մեր ծրագրերից է նաև DAB սեմինարների անցկացումը, որը վերաբերում է նախագծերի և սցենարների մշակմանը, որին ներկայացվել է փորձագետների կողմից ընտրված 10 լիամետրաժ նախագիծ` Հայաստանից, Ռուսաստանից, Վրաստանից, Ղազախստանից»,– ասաց Հարությունյանը։
Նա հիշեցրեց նաև, որ անցկացվել է կարճամետրաժ և վավերագրական ֆիլմերի երկրորդ սեմինարը այն նախագծերի համար, որոնք ուղղված են հայ–թուրքական համատեղ արտադրությանը։ Ավելին` այս հարթակի շրջանակում արդեն 16 ֆիլմ կա, որոնք ներկայացվել են «Ոսկե ծիրան» կինոփառատոնում։
«Ծրագրի մի մասն է նաև «Կինոլրագրություն առանց սահմանների» նախագիծը։ Մենք օրաթերթ ունենք, որ հրատարակվում է փառատոնի անցկացման ընթացքում։ Ներկայացվել է նաև «Երգ Նոլայի համար» ֆիլմի դեմո–տարբերակը, որը նկարահանվել է Վանաձորում»,– ասաց Հարությունյանը։ Նրա խոսքով` կինոնկարի դեմո–տարբերակը իրագործվել է ոչ մեծ դրամաշնորհի շնորհիվ, որպեսզի մասնակցի տարբեր ֆորումների, համալրի բյուջեն, ինչն էլ կօգնի լիովին նկարահանել ֆիլմը։
«Ոսկե ծիրան» միջազգային կինոփառատոնը Երևանում անցկացվում է 2004թ.-ից և համարվում է տարածաշրջանի ամենաճանաչվածներից մեկը: Այդ տարիների ընթացքում Հայաստան են ժամանել հայտնի դերասաններ և ռեժիսորներ, որոնց թվում նաև` գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։ 2010 թվականին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին: -0-
