ԵՐԵՎԱՆ, 17 հոկտեմբերի. /Նովոստի–Արմենիա/. Հայտնի դաշնակահար Ալեքսանդր Ռոմանովսկին (Ուկրաինա, Իտալիա) Հայաստանի պետական երիտասարդական նվագախմբի հետ` Սերգեյ Սմբատյանի գլխավորությամբ, կկատարի Արամ Խաչատրյանի դաշնամուրի և նվագախմբի կոնցերտը։
Երաժիշտը ստեղծագործությունը սովորել է հատուկ երևանյան համերգի համար, որը նախատեսված է հոկտեմբերի 19–ին Արամ Խաչատրյանի անվան համերգասրահում, ականավոր կոմպոզիտորի անունը կրող միջազգային երկրորդ փառատոնի շրջանակում։ Իսկ երեկոն կնվիրվի հայտնի դիրիժոր և ջութակահար Վլադիմիր Սպիվակովի 70–ամյակին։
«Շատ շնորհակալ եմ, որ ինձ առաջարկել են սովորել այս կոնցերտը։ Դա ինձ շատ մոտ երաժշտություն է։ Խաչատրյանն իսկապես հանճարեղ է։ Կոնցերտի յուրաքանչյուր նոտա լի է էմոցիաներով, և ես մտադիր եմ այն հետագայում նույնպես կատարել»,– ուրբաթ մամուլի ասուլիսի ընթացքում ասաց Ռոմանովսկին։
Ըստ նրա, Հայաստանն առանձնահատուկ վայր է, որտեղ ցանկանում ես ավելի ու ավելի հաճախ այցելել։
«Սա արդեն իմ երրորդ այցն է շատ կարճ ժամանակահատվածում, բայց ես զգում եմ, որ դա միայն սկիզբն է։ Այստեղ շատ բան եմ գտել, ինչն ինձ համար կարևոր է երաժշտության մեջ։ Զգում եմ, որ Հայաստանն ինձ ձգում է»,– ավելացրեց երաժիշտը։
Նա նշեց, որ հետագայում ծրագրում է շարունակել ուսումնասիրել Խաչատրյանի և այլ հայ կոմպոզիտորների երաժշտությունը։
Ռոմանովսկին մեկնաբանեց նաև և համագործակցությունը Հայաստանի պետական երիտասարդական նվագախմբի հետ` նշելով, որ նվագախմբի հետ աշխատանքն առավել հաջողվածներից կլինի։
«Առաջին անգամ միասին կատարել ենք Պրոկոֆևի կոնցերտը, որը բավականին բարդ ստեղծագործություն է։ Չնայած, որ այդքան էլ շատ փորձեր չենք ունեցել, դա լավագույն կատարումներից էր, թեև ես բավականին հաճախ եմ նվագում տարբեր նվագախմբերի հետ»,– ասաց դաշնակահարը։
Ալեքսանդր Ռոմանովսկին ծնվել է 1984 թվականին Ուկրաինայում։ 17 տարեկանում արժանացել է Բուզոնիի իտալական մրցույթի առաջին մրցանակի։ Դաշնակահարը ելույթ է ունեցել այնպիսի հայտնի նվագախմբերի հետ, ինչպես Մարիինյան թատրոնի նվագախումբը Վալերի Գերգիևի գլխավորությամբ, Լոնդոնի թագավորական ֆիլհարմոնիկ նվագախմբի և Անգլիական կամերային նվագախմբի հետ։ 2013 թվականից Ռոմանովսկին Խարկովում (Ուկրաինա) Կրայնևի պատանի դաշնակահարների միջազգային մրցույթի գեղարվեստական ղեկավարն է։ -0-
