Շուշիում ավարտվեց Քանդակի միջազգային երրորդ սիմպոզիումը

ՍՏԵՓԱՆԱԿԵՐՏ, 30 հուլիսի. /Նովոստի–Արմենիա/. Արցախի Շուշի քաղաքում նախօրեին ավարտվեց Հակոբ Գյուրջյանի անվան քանդակի միջազգային երրորդ սիմպոզիումը, հայտնում է Արցախի հանրային հեռուստատեսությունը։

Միջոցառման փակման հանդիսավոր արարողության ընթացքում Արցախի Հանրապետության մշակույթի և երիտասարդության հարցերի նախարար Նարինե Աղաբալյանը հայտարարել է, որ այս օրերին Շուշիում ստեղծվել են արվեստի այնպիսի նմուշներ, որոնք մարդկությանն ուղղված խաղաղության յուրօրինակ կոչ են։

Հնդկացի քանդակագործ Կանտա Կիշորա Մոխարանային այնպես է դուր եկել Ղարաբաղը, որ նա նույնիսկ այնտեղ բնակություն հաստատելու ցանկություն է հայտնել ։

«Ինձ շատ է դուր եկել Ղարաբաղը, սա շատ գեղեցիկ, հիասքանչ բնություն ունեցող փոքր երկիր է։ Եթե հրավեր ստանամ, ապա մեծ հաճույքով կմնամ այստեղ, կստեղծագործեմ և աշխատանքներս սիրով կնվիրեմ Արցախին»,– նշել է Մոխարանան։

Իտալացի քանդակագործ Ագոստինո Լիպպին իր հերթին նշել է, որ արցախցիների հպարտությունը նրան մեծ ուժ է տալիս։

«Ես հեռանում եմ Արցախից մեծ տպավորություններով և, ոգեշնչված այս ամենով, անկասկած, կշարունակեմ խաղաղության թեման»,– ասել է Լիպպին։

ԼՂՀ Մշակույթի նախարարության ղեկավարը նվերներ և պատվոգրեր է հանձնել սիմպոզիումի բոլոր մասնակիցներին։

Հակոբ Գյուրջյանի անվան քանդակի միջազգային երրորդ սիմպոզիումը, որին մասնակցել են պրոֆեսիոնալ քանդակագործներ Արցախից, Հայաստանից, Իտալիայից, Հնդկաստանից, Շվեյցարիայից և Բելառուսից, անցել է «Խաղաղություն Արցախին» կարգախոսով և նվիրված է եղել հրադադարի մասին համաձայնագրի 20–ամյակին։

Սիմպոզիումի ընթացքում ստեղծած 13 քանդակներ կմնան Շուշիում և կտեղադրվեն քաղաքի տարբեր մասերում։ -0-