ԵՐԵՎԱՆ, 17 հուլիսի. /Նովոստի–Արմենիա/. Հայաստանը, Բելառուսը, Մեծ Բրիտանիան, Իսրայելը, Իրանը, Իտալիան, Չինաստանը, Լիտվան, Պորտուգալիան, ԱՄՆ–ն, Թուրքիան և Ճապոնիան միավորած «Ընկերներ ենք հավաքում» միջազգային երաժշտական փառատոնն ութերորդ անգամ կանցնի Մոսկվայում օգոստոսի 2–28–ը։
Փառատոնի կազմակերպիչներն են` Մոսկվայի Պ.Ի.Չայկովսկու անվան պետական կոնսերվատորիան և «Աշխարհի երաժշտական մշակույթներ» գիտաստեղծագործական կենտրոնը։ Միջոցառման ընթացքում կկազմակերպվի 22 համերգ, որոնք կանցնեն քաղաքի տարբեր բեմերում, հիմնականում, Մոսկվայի կոնսերվատորիայի Ռախմանինովի դահլիճում և Ն.Յա. Մասկովսկու անվան համերգասրահում։
Երաժշտական փառատոնը կբացի մոսկովյան երաժշտասերի կողմից արդեն իսկ սիրված Սբ.Մեսրոպ Մաշտոցի եկեղեցու կանանց երգչախումբը Հայաստանից` Առնո Բարխուդարյանի գլխավորությամբ։ Ծրագրում հայկական հոգևոր երաժշտություն է, ռուս և հայ կոմպոզիտորների ստեղծագործություններ, հայկական ժողովրդական երգերի մշակումներ, հաղորդում է «ՌԻԱ Նովոստին»։
Հանդիսատեսի ուշադրությանը կներկայացվեն նաև գործիքային զանազան անսամբլներ, որոնց թվում են` ռուս–պորտուգալական դաշնամուրային դուետ Էլեոնորա Կարպուխովա և Ջիլ Լուսոն, լիտվական, թուրքական և դասական քառյակներ։
Փառատոնի կենտրոնական իրադարձություններից մեկը կդառնա Մոսկվայի կոնսերվատորիայի միջազգային ամառային դպրոցի սովորողների ելույթը։ Մասնակիցների ընտրությունը կատարում են հաստատության դասախոսները, ովքեր չեն շտապում հրապարակել նրանց անունները, ինչպես նաև ծրագիրը։ Միջոցառման հյուրերն ամեն ինչ կիմանան համերգից անմիջապես առաջ։ -0-
