ԵՐԵՎԱՆ, 23 հունիսի. /Նովոստի-Արմենիա/. Բրիտանացի երաժիշտ Սթինգը հայտարարել է, որ չի պատրաստվում իր 306 մլն դոլարի կարողությունը ժառանգություն թողնել զավակներին, գրում է ՌԻԱ Նովոստին՝ հղում անելով Daily Mail թերթին:
Սթինգն ամենահարուստ բրիտանացի երաժիշտներից է։ Նա թերթի թղթակցի հետ զրույցում պատմել է, որ իր վեց երեխաների համար այդ ժառանգությունը «ծանր բեռ կդառնա», և նաև նշել է, որ չի վստահում հավատարմագրային հիմնադրամներին։
«Երեխաներիս ասել եմ, որ շատ փող չի մնա, քանի որ մենք շատ ենք ծախսում, ֆինանսական պարտավորություններ ունենք: Չեմ ցանկանում փողերը հավատարմագրային հիմնադրամներին թողնել», - հայտարարել է երգիչը: Ինչպես գրում է թերթը, Սթինգը կարծում է, որ երեխաները պետք է աշխատեն: «Իմ բոլոր երեխաները գիտեն դա, և նրանք շատ հազվադեպ են ինձնից որևէ բան խնդրում, և ես իսկապես հարգում եմ նրանց այդ պահվածքը», - ավելացրել է երաժիշտը:
Սթինգը (իսկական անունն է Գորդոն Մեթյու Թոմաս Սամներ) բրիտանացի երաժիշտ է, 1976-1984 թթ.-ին գլխավորել է The Police խումբը: 1984 թ.-ից մենակ է ելույթ ունենում: Հոլիվուդի Փառքի ծառուղում նա աստղի է արժանացել երաժշտության ոլորտում գրանցած ձեռքբերումների և ներդրման համար: 62-ամյա երաժիշտը երկու երեխա ունի առաջին ամուսնությունից և չորս երեխա՝ երկրորդ ամուսնությունից:-0-
