ԵՐԵՎԱՆ, 6 հունիսի. /Նովոստի–Արմենիա/. Հայտնի գերմանացի թավջութակահար Ալեքսանդր Հյուլսհոֆը հունիսի 7–ին ելույթ կունենա Երևանում` Հայաստանի պետական ֆիլհարմոնիկ նվագախմբի նվագակցությամբ, հաղորդում է նվագախմբի մամուլի ծառայությունը։
Համերգը տեղի կունենա Ա. Սպենդիարյանի անվան օպերայի և բալետի ազգային ակադեմիական թատրոնում։
«Առաջին բաժնում կհնչեն Կամիլիա Սեն-Սանս. «Մահվան պար» ստեղծագործությունը և Թավջութակի կոնցերտ թիվ 1 (Ալեքսանդր Հյուլսհոֆի մեկնաբանությամբ), երկրորդ բաժնում կկատարվի Չայկովսկու Սիմֆոնիա թիվ 6 «Պաթետիկական» ստեղծագործությունը», – նշվում է հաղորդագրության մեջ։
Գերմանացի թավջութակահար Ալեքսանդր Հյուլսհոֆը ելույթ է ունեցել այնպիսի հայտնի երաժշտական համույթների հետ, ինչպիսիք են Բրանդերբուրգի, Լիմբուրգի սիմֆոնիկ նվագախմբերն ու Չեխիայի ֆիլհարմոնիկ նվագախումբը։
Հայաստանի պետական ֆիլհարմոնիկ նվագախումբը հիմնադրվել է 1936թ.-ին՝ ականավոր հայ երաժիշտ Կոնստանտին Սարաջևի կողմից: Այսօրվա դրությամբ նվագախումբը հաջողությամբ ելույթ է ունենում ինչպես Հայաստանում, այնպես էլ արտերկրում։
«Նովոստի–Արմենիա» գործակալությունը նվագախմբի տեղեկատվական հովանավորն է։–0–
