ԵՐԵՎԱՆ, 21 մայիսի. /Նովոստի–Արմենիա/. Հայաստանի տարածքում բնակվող ազգային փոքրամասնություններին նվիրված «Հայաստանը մեր տունն է» փառատոնն անցկացվեց չորեքշաբթի Երևանի Ա.Բաբաջանյանի անվան համերգասրահում։
Մշակութային բազմազանության համաշխարհային օրվան նվիրված մեկօրյա փառատոնի շրջանակում, մասնավորապես, անցկացվեց ազգային փոքրամասնությունների համայնքներում պատրաստած դեկարոտիվ–կիրառական իրերի ցուցահանդես, ինչպես նաև նրանց մշակութային ավանդույթներին նվիրված համերգային ծրագիր։
«Մենք պարբերաբար անցկացնում ենք այս փառատոնը, սկսած 2001 թվականից, և տարեցտարի ազգային փոքրամասնությունների համայնքներում միջոցառման նկատմամբ հետաքրքրությունն աճում է։ Այսպես, այս տարի մեր փառատոնին մասնակցում են Հայաստանի 11 ազգային փոքրամասնությունների ներկայացուցիչներ»,– ասաց փառատոնի համակարգող Արմենուհի Դեմիրճյանը։
Ըստ նրա, նախատեսված 120 մասնակիցների փոխարեն այս տարի փառատոնին մասնակցեց մոտ 160 մարդ։
Հայաստանի մշակույթի նախարարության ժամանակակից արվեստի վարչության պետի տեղակալ Արամ Գյուրջյանն իր հերթին նշեց, որ տվյալ միջոցառոըմը պետական և մասնավոր հատվածների համագործակցության օրինակ է և երկրում միջմշակութային երկխոսության զարգացման արդյունավետ ձև։
Ինչպես նշեց Հայաստանի ազգային փոքրամասնությունների մշակույթի համակարգման խորհրդի ղեկավար Ռազմիկ Խոսրոեվը, Հայաստանն այն հազվադեպ երկրներից է, որտեղ ակտիվորեն սատարում են ազգային փոքրամասնություններին։
«Մենք քաղաքական խնդիրներ չունենք։ Մեր բոլոր խնդիրները, հիմնականում, մշակութային–կրթական բնույթի են, որոնք պետք է լինեն կառավարության և երկրի ղեկավարության մշտական ուշադրության կենտրոնում»,– ասաց նա, ավելացնելով, որ ազգային փոքրամասնությունների բազմաթիվ համայնքներ այլ երկրներում կարող էին միայն երազել պետության այսպիսի վերաբերմունքի մասին։
Փառատոնի կազմակերպիչը Հայաստանի մշակույթի նախարարությունն է։
Հայաստանում ապրում են 11 ազգային փոքրամասնությունների ներկայացուցիչներ` քրդեր, եզդիներ, ասորիներ, հույներ, ռուսներ, ուկրաինացիներ, հրեաներ, բելառուսներ, վրացիներ, գերմանացիներ և լեհեր։
Պաշտոնական տվյալներով, ազգային փոքրամասնությունները կազմում են Հայաստանի բնակչության 2.5 տոկոսը։ Հայաստանի ամենամեծ համայնքը եզդիականն է` մոտ 42 հազար մարդ, մոտ 14 հազար էլ ռուսական համայքն է, նրանցից 5 հազարը` մոլոկաններ։ Հայաստանում ապրում են մոտ 3.6 հազար ասորիներ, 3.5 հազար ուկրաինացիներ, 1.3 հազար հույներ։ Մյուս համայնքները չեն գերազանցում 1000–ը։ -0-
