ԵՐԵՎԱՆ, 13 մայիսի. /Նովոստի–Արմենիա/. Ռուս բանաստեղծ Վլադիմիր Իսայչևի «Սիրո ճանապարհով» գրքի հայերեն թարգմանության շնորհանդեսը և բանաստեղծի ստեղծագործական երեկոն տեղի կունենան ուրբաթ Երևանի «Մոսկվայի տուն» կենտրոնում։
«Սիրո ճանապարհով» գիրքը թարգմանել է Լևոն Բլբուլյանը, կազմել և սրբագրել է Ալբերտ Օհանյանը։
Երեկոյի ընթացքում ելույթ կունենան Ռուսաստանի ժողովրդական արտիստ Լիդիա Նեբաբան և Բուլղարիայի ու Ռուսաստանի վաստակավոր արտիստ Բիսեր Կիրովը, ովքեր կկատարեն Վլադիմիր Իսայչևի «Աշնանային պարահանդես», «Նվիրականը», «Ընկերների երգերը» բանաստեղծությունների հիման վրա գրված երգերը։
Միջոցառումը կազմակերպվել է ՀՀ–ում Ռոսսոտրուդնիչեստվոյի ներկայացուցչության կողմից Ռուսաստանի և Հայաստանի գրողների միության, «Ջավախք» բարեգործական հիմնադրամի և «Վերադարձ դեպի ակունքներ» համառուսական հասարակական շարժման հետ համատեղ։
Երեկոյի հյուրերը նաև հնարավորություն կունենան ծանոթանալ Վլադիմիր Իսայչևի բանաստեղծություններին, ռոմանսներին, երաժշտական ալբոմներին։
Վլադիմիր Իսայչևը պետական և հասարակական գործիչ է, իրավաբան, Ռուսաստանի Գերագույն Արբիտրաժային դատարանի նախագահի տեղակալն է, բանաստեղծ, Ռուսաստանի գրողների միության համանախագահն է, «Վերադարձ դեպի ակունքներ» համառուսական հասարակական շարժման, «Բյուրեղապակյա բանալի» բանահյուսական արվեստի միջազգային փառատոնի հիմնադիրն է։
Իսայչևն աշխարհում առաջին անգամ որպես հետազոտող օդաչու թռիչք է կատարել «Սվյատայա Ռուս» օդապարիկով Բայկալ լճի անոմալ գոտու վրայով։
2014 թ.–ի մարտի 30–ին Պատրիարք Կիրիլը Ռուս Ուղղափառ Եկեղեցու կարիքների նկատմամբ ցուցաբերած ուշադրության համար «Վերադարձ դեպի ակունքներ» համառուսական հասարակական շարժման նախագահ Վ.Ն. Իսայչևին պարգևատրել է սուրբ բարեպաշտ իշխան Դանիիլ Մոսկվացու երրորդ աստիճանի շքանշանով։–0–
