ԵՐԵՎԱՆ, 26 փետրվարի. /Նովոստի–Արմենիա/. Հայոց ցեղասպանության թեմայով 3-6–րոպեանոց խաղարկային և վավերագրական ֆիլմերի լավագույն սցենարների մրցույթ կանցկացի, չորեքշաբթի լրագրողներին հայտնեց Երևանի «Ոսկե ծիրան» միջազգային կինոփառատոնի տնօրեն Հարություն Խաչատրյանը։
«Փյունիկ» բարեգործական հիմնադրամի և «Ոսկե ծիրան» կինոյի զարգացման հիմնադրամի կազմակերպած մրցույթը նվիրված է Հայոց ցեղասպանության 100–ամյա տարելիցին։
«Մրցույթին մասնակցել ցանկացողները պետք է մինչև հունիսի 30–ը սցենարներն ուղարկեն «Ոսկե ծիրան» կինոյի զարգացման հիմնադրամ։ Մրցույթի հատուկ ժյուրին ներկայացված հայտերից կընտրի տասը լավագույն աշխատանքները, որոնց հիման վրա այնուհետև կնկարահանվեն ֆիլմեր»,– ասաց նա «Նովոստի» միջազգային մամուլի կենտրոնում հրավիրված մամուլի ասուլիսի ընթացքում։
Նշելով, որ մրցույթը չունի տարիքային և ազգային սահմանափակումներ` Խաչատրյանը միաժամանակ հույս հայտնեց, որ մրցույթին մասնակցելու ցանկություն կհայտնեն ոչ միայն Հայաստանի, այլ նաև ուրիշ երկրների բնակիչներ։
Նշելով, որ երեք լավագույն սցենարների հեղինակներ կստանան 1000 դոլարին համարժեք գումար, մյուս յոթի հեղինակները` 500 դոլարին համարժեք դրամ։
Պատասխանալեով «Նովոստի–Արմենիա» գործակալության հարցին` Խաչատրյանը նշեց, որ իր կարծիքով ֆիլմերի տևողությունը շատ կարճ չէ։
«Կարծում եմ` մի քանի րոպեն բավական է մարդկանց հիշողությունների խճանկար հավաքելու և ոչ մեծ, բայց միաժամանակ զգայական ֆիլմ նկարահանելու համար, որն իր մեջ ինչ–որ պատգամ է կրում»,– ասաց նա։
Խաչատրյանը հայտնեց նաև, որ հետագայում նկարահանված ֆիլմերը կներկայացվեն Երևանի «Ոսկե ծիրան» միջազգային կինոփառատոնի շրջանակում։
«Փյունիկ» բարեգործական հիմնադրամի հոգաբարձուների խորհրդի նախագահ Լևոն Սարգսյանը հայտնեց, որ Հայոց ցեղասպանության 100–ամյա տարելիցի շրջանակում հիմնադրամը ֆինանսավորել է մոտ 100 մշակութային ծրագիր, որոնցից 30-35–ն արդեն իսկ իրագործվել են։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
