Չորս ֆիլմերի պրեմիերաները կանցկացվեն «Ոսկե ծիրան» կինոփառատոնի շրջանակում

Հայ-թուրքական կինոհարթակի շրջանակում՝ չորս կինոնկարների պրեմիերաները կարող են անցկացվել 2012թ.-ի Երևանի «Ոսկե ծիրան» միջազգային իններորդ կինոփառատոնի ընթացքում, «Նովոստի-Արմենիա» գործակալությանը տեղեկացրեց փառատոնի գեղարվեստական տնօրեն Սուսաննա Հարությունյանը:

Հայ-թուրքական կինոհարթակն առաջին անգամ ներկայացվել է 2009թ.-ին՝ «Հանդիպումներ կամուրջի վրա» ծրագրի շրջանակներում՝ Ստամբուլի միջազգային 28-րդ կինոփառատոնի ընթացքում: 2011թ.-ին Երևանի «Ոսկե ծիրան» ութերորդ փառատոնի ընթացքում ցուցադրվեցին առաջին հինգ ֆիլմերը, որոնք նկարահանվել էին կինոհարթակի ձևաչափով:

Ըստ Հարությունյանի, այժմ նկարահանման փուլում են գտնվում հետևյալ կինոնկարները՝  Ադրինե Գրիգորյանի «Ետ դեպի Գուրյուն», Արթուր և Նարեկ Բախտամյանների «Սուրբ ծննդյան ուղևորություն», Նիկոլ Պեզճյանի «Պտույտ մը Պոլսո թաղերուն մեջ» և հայկական ծագումով թուրք ռեժիսոր, Հրանտ Դինքի («Ակոս» շաբաթաթերթի գլխավոր խմբագիր, որին սպանեցին 2007թ.-ին Ստամբուլում) զարմուհի Լուսին Դինքի «Հիանալի է, ուղղակի հիասքանչ. Բիթլիսից դեպի Ամերիկա»:

Ինչպես տեղեկացրեց Հարությունյանը, հայ-թուրքական կինոհարթակի շրջանակներում վարպետության դասերի համար հայտերի հաջորդ ընդունումը կմեկնարկի 2012թ.-ի փետրվարին:
«Ոսկե ծիրան» միջազգային կինոփառատոնը Երևանում անցկացվում է 2004թ.-ից և համարվում է տարածաշրջանի ամենաճանաչվածներից մեկը: Անցած տարի Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին: -0-