Insomnia հայտնի կինոընկերությունը կզբաղվի աղմուկ բարձրացրած «Խճճված զուգահեռներ» հայկական ֆիլմի տարածմամբ

Ռեժիսոր Հովհաննես Գալստյանի «Խճճված զուգահեռներ» ֆիլմի տարածմամբ կզբաղվի Ֆիլմերի վաճառքով զբաղվող համաշխարհային ճանաչում ունեցող Insomnia ընկերությունը, հայտնեց ՀՀ ազգային կինոկենտրոնի հասարակայնության հետ կապերի պատասխանատու Ռուզան Բագրատունյանը: 

«Հայկական կինոյի պատմության մեջ առաջին անգամ Կաննում ստորագրվեց ֆիլմի համաշխարհային տարածման պայմանագիրը, որի համաձայն Insomnia ընկերությունն իր վրա վերցրեց հինգ տարի ժամկետով «Խճճված զուգահեռներ» ֆիլմի մատակարարման պարտավորությունները»,- չորեքշաբթի հրավիրված ասուլիսի ժամանակ ասաց Բագրատունյանը:

«Խճճված զուգահեռներ» հայ-նորվեգական-գերմանական արտադրության ֆիլմը նկարահանվել է 2009թ.-ին: Կինանկարի գլխավոր դերերը կատարել են նորվեգացի դերասանուհի Սիրի Հելեն Մյուլերը և ֆրանսիացի դերասան, հայկական ծագումով ռեժիսոր Սերժ Ավեդիկյանը:

2009թ.-ին ֆիլմը Օրենբուրգում «Արևելք-Արևմուտք» միջազգային կինոփառատոնին արժանացել է լավագույն կնոջ դեր անվանակարգի մրցանակին և ներկայացվել է մի շարք միջազգային կինոփառատոների:
Նա նշեց նաև, որ այս տարի Կաննում հայկական պատվիրակությունն առաջին անգամ չեխական, ուկրաինական և բելառուսական կինոընկերությունների հետ կինոարտադրության ոլորտում համատեղ համագործակցության վերաբերյալ մի շարք պայմանագրեր է նախաստորագրել:

Կինոկենտրոնի տնօրեն Գևորգ Գևորգյանն իր հերթին նշեց, որ այսօրվա դրությամբ Հայաստանը փաստացիորեն գերիշխում է ԱՊՀ երկրների շրջանում՝ միջազգային կինոշուկաներում ներկայացված ֆիլմերի քանակով:
Ըստ նրա, մասնավորապես հայկական պատվիրակությունն արդեն մշտական տաղավարներ ունի Կաննի և Մոսկվայի միջազգային կինոփառատոնի կինոշուկայում: -0-