Ջիվան Գասպարյանի ստեղծագործական գործունեության հոբելյանը Երևանում կնշեն համերգով

Համաշխարհային ճանաչում ունեցող հանճարեղ երաժիշտ Ջիվան Գասպարյանի 65-ամյակին նվիրված  համերգը տեղի կունենա օգոստոսի 15-ին Երևանի Օպերայի և բալետի ազգային ակադեմիական թատրոնում:

«Այդ համերգը յուրահատուկ կլինի, քանի որ կմասնակցեն բացառապես հայ երաժիշտներ»,- հինգշաբթի Երևանում հրավիրված մամուլի ասուլիսի ժամանակ հայտնեց Գասպարյանը:

Ծրագրի մեջ ընդգրկված են տարբեր երաժշտական ժանրերի ստեղծագործություններ՝ էստրադային-ջազայինից մինչև դասական: Մասնակիցների թվում է հայտնի ջազային երաժիշտ Վահագն Հայրապետյանը, ժողովրդական և դասական երաժշտության հայտնի կատարող Աննա Մալյանը, դուդուկահարների քառյակը, ինչպես նաև վարպետի թոռ Ջիվան Գասպարյան կրտսերը:

«Իմ ողջ ստեղծագործական գործունեության ընթացքում ես գրեթե 20 հազար համերգ եմ տվել ողջ աշխարհում, և արդեն վաղուց է՝ ելույթ չեմ ունեցել Հայրենիքում»,- նշեց դուդուկի վարպետը:
Գասպարյանն ավելացրեց, որ ծրագրում է բարեգործական համերգներ անցկացնել Գյումրիում և Սպիտակում՝ 1988թ.-ի երկրաշարժից տուժածների համար:

Դաշնակահարների համաշխարհային մրցույթի դափնեկիր Արմեն Բաբախանյանն իր հերթին ընդգծեց առաջիկա համերգի յուրահատկությունը:

«Մենք դուդուկը կներկայացնենք ոչ միայն դասական ձևով...Դուք բեմում կտեսնեք և կլսեք վիրտուոզի ձեռքում այդ երաժշտական գործիքի հնարավորույունների զարգացումն ու փոխակերպությունը»,- ասաց դաշնակահարը:

Այսօրվա դրությամբ Ջիվան Գասպարյանն աշխարհի ամենահայտնի երաժիշտներից մեկն է: Իր վիրտուոզ տեխնիկայի և կատարողական արվեստի շնորհիվ, նա ողջ աշխարհով հայտնի դարձրեց հայկական ժողովրդական գործիք դուդուկը՝ ծիրանի փայտից պատրաստած շվին, որը հնչելիս միաժամանակ ֆլեյտա և հոբոյ է հիշեցնում:

Նրա ձայնասկավառակները վաճառվում են ողջ աշխարհում միլիոնավոր տպաքանակով: Հոլիվուդի ականավոր ռեժիսորները կանոնավոր կերպով հրավիրում են մաեստրոյին «անուրջների ֆաբրիկայի» լավագույն ֆիլմերի երաժշտությունը ձայնագրելու համար: -0-