Հայաստանը կմասնակցի 54-րդ վենետիկյան բիենալեին երկու ինստիտուցիայով

Հայաստանը Վենետիկի 54-րդ բիենալեին կներկայանա երկու ինստիտուցիայով՝ Ազգային տաղավարով Մշակույթի նախարարության օժանդակությամբ և «Արվեստների ու մշակութային հետազոտությունների լաբորատորիայի» ցուցադրությամբ, երկուշաբթի լրագրողներին հայտնեց Լաբորատորիայի հիմնադիր և նախագահ Սուսաննա Գյուլամիրյանը:

Նրա խոսքով՝ ցուցադրության առանցքային թեման կդառնա «երևակայական աշխարհագրություն» նախագիծը, որի հեղինակներն են նկարիչ Արչի Կալենցը՝ հայ ականավոր նկարիչներ Հարություն և Արմինե Կալենցների թոռը, և Լաբորատորիայի երկու արվեստագետներ Կարեն Հակոբյանը և Հարություն Սիմոնյանը:

«Արչի Կալենցի նախագիծն իրենից Լեռնային Ղարաբաղին նվիրված ինը վիմագրություններից բաղկացած շարք է ներկայացնում «Սև Այգի» անվանումով»,- ասաց Գյուլամիրյանը:

Պատասխանելով այն հարցին՝ թե կարող է, արդյո՞ք, «Սև այգի» նախագիծը  ադրբեջանական պատվիրակության դժգոհությունն առաջ բերի, Գյուլամիրյանը հայտարարեց, որ ցանկացած դեպքում հայկական կողմը չի պատրաստվում հետ կանչել իր նախագիծը: «Շատ հնարավոր է, որ կարող են բողոքներ լինել, սակայն դա ստեղծագործման համար նորմալ է»,- նշեց նա՝ հավելելով, որ բիենալեի կազմակերպիչները նման սահմանափակումներ չեն դրել:
Ըստ նրա, երևակայական աշխարհագրության գաղափարը Արևմուտքի համեմատ Արևելքի հետամնացության և բարբարոսության մասին տարածված առասպելը հերքելու նպատակ ունի: -0-