ԵՐԵՎԱՆ, 11 հունվարի. /Նովոստի-Արմենիա/. Հոլիվուդյան դերասան Մայքլ Դուգլասը (Michael Douglas), ում նախորդ տարվա օգոստոսին կոկորդի քաղցկեղ էին ախտորոշել, հարցազրույցում ասել է, որ բուժման արդյունքում ուռուցքն անհետացել է, երեքշաբթի մեջբերում է Hollywoodreporter.com կայքը։
«Ես ինձ հրաշալի եմ զգում և մեծ թեթևություն ապրում։ Ուռուցքն անհետացել է։ Ճիշտ է՝ այսուհետ ես պետք է ամեն ամիս զննում անցնեմ, այնպես որ լիարժեք էյֆորիայի մասին խոսք չկա։ Հնարավոր է՝ ևս երկու ամիս անցնի զննման համար։ Ընդհանուր առմամբ, վերջին տարիներն ահավոր ռիթմով անցան»,- դերասանի խոսքերն է մեջբերում ռեսուրսը, հաղորդում է ՌԻԱ Նովոստին։
Դուգլասն ասել է, որ առայսօր զգում է քիմիաթերապիայի կողմնակի ազդեցությունը, որն, ըստ էության, արտահայտվում է քնելուն խանգարող բերանի չորությամբ։
«Կորցրած 32 ֆունտից (14 կգ) ես վերադարձրել եմ 12-ը, մնում է հավաքել ևս 20 կամ 25 ֆունտ»,- նշել է նա։
Բացի սննդից, դերասանին զբաղեցնում է աշխատանքը՝ նա պատրաստվում է նկարահանվել Սթիվեն Սոդերբերգի ֆիլմում ՁԻԱՀ-ից 1987 թվականին մահացած շոումեն և դաշնակահար Լիբերաչեի (Liberace) դերում և կիրակի օրը պատրաստվում է ներկա լինել «Ոսկե գլոբուս» մրցանակաբաշխությանը։ Դուգլասն առաջադրվել է Օլիվեր Սթոունի «Ուոլ սթրիթ. փողերը երբեք չեն քնում» (Wall Street: Money Never Sleeps) ֆիլմում երկրորդ պլանի լավագույն դերի մրցանակի։ 1987 թվականին առաջին «Ուոլ սթրիթի» համար Դուգլասն «Օսկար» ստացավ, քսան տարի անց նա հաջողությամբ վերադարձավ խարդախ ֆինանսիստ Գորդոն Գեքոյի կերպարին։ 2010 թվականին Սթոունի ֆիլմը վարձույթի հանձնվեց անմիջապես այն բանից հետո, երբ հայտնի դարձավ դերասանի ախտորոշումը։
«Դատելով նրանից, թե ինչ է ինձ հայտնի քաղցկեղի այդ տեսակի մասին, կարծում եմ, որ հաղթանակի իմ հնարավորությունները բավականին մեծ են։ Բախտս առհասարակ բերել է ժառանգականության հարցում՝ իմ մայրիկն 88 տարեկան է, հայրս՝ 94։ Բայց ամեն դեպքում ես հասկացա, որ մոտեցել եմ երրորդ ակտին, հասկացա, որ ժամանակս քիչ է, և այն պետք է խելացի կերպով ապրել»,- ասել է Դուգլասը։
Մայքլ Դուգլասը ծնվել է 1944 թվականին լեգենդար դերասան Քյորք Դուգլասի և դերասանուհի Դիանա Դուգլաս Դերիդի ընտանիքում: 2000 թվականին Դուգլասը կնության առավ երիտասարդ դերասանուհի Քեթրին Զեթա-Ջոնսին:--0-
