Հայկական մուլտիպլիկացիան աջակցության կարիք ունի. մուլտիպլիկատոր

Հայկական մուլտիպլիկացիան հետագա զարգացման համար աջակցության կարիք ունի, կարծում է ռուս հայտնի նկարիչ-մուլտիպլիկատոր Ալեքսանդր Պետրովը՝ կինոարտադրության աշխարհում «Օսկար» հեղինակավոր մրցանակի դափնեկիրը։  

«Հայկական անիմացիայի զարգացման համար անհրաժեշտ է ինչպես պետության, այնպես էլ անհատների աջակցությունը։ Մասնագետների ու մանկավարժների պատրաստումը շատ երկար ու բարդ աշխատանք է, և եթե այդ մասին չմտածենք հիմա, ապա հետո բարդություններ կառաջանան»,- նա ասաց լրագրողներին Երևանում։

Ալեքսանդր Պետրովը Երևանում է հայկական մուլտիպլիկացիայի 70-ամյա տոնակատարությունների կապակցությամբ, որը նշվում է Մանկապատանեկան ֆիլմերի չորրորդ միջազգային փառատոնի շրջանակներում հոկտեմբերի 16-20-ը։     

Պետրովը, ով գրեթե երկու տարի աշխատել է Հայաստանում, քաջածանոթ է հայկական անիմացիային։ Սովորելով համալսարանի վերջին կուրսերում՝ նա աշխատել է մի քանի հայկական հանրահայտ մուլտֆիլմերի վրա, որոնցից մեկն էլ «Հեքիաթ հայելու մասին» մուլտֆիլմն է։  

Ինչպես կարծում է ռուս անիմատորը, հայկական մուլտիպլիկացիայում շատ լավ ավանդույթներ, տաղանդաշատ գործիչներ կան, ովքեր մեծ հաճույքով զբաղվում են իրենց գործով և վստահ են, որ իրենց աշխատանքը մարդկանց ուրախություն է պատճառում։

«Հայկական նկարված կինոն գոյություն ունի և շարունակելու է ապրել, միայն թե նրան օգնել ու զարգացնել է պետք»,- ասաց Պետրովը։

Նրա խոսքերով, նկարիչների, ռեժիսորների և անիմատորների հին սերունդը օրերից մի օր հեռանալու է գործից, և պետք է, որ երիտասարդ սերունդը փոխարինի հեռացողներին։

«Երիտասարդ սերունդը ցանկացած մշակույթի, ցանկացած դպրոցի գոյության պայմանն է։ Այդ իսկ պատճառով նրանց կրթությունն ամենակարևորն է»,- ասաց Պետրովը։

Ալեքսանդր Պետրովի ամենահայտնի աշխատանքների թվում են «Իմ սերը», «Ձմեռվա օրեր», «Ջրահարսը», «Ծիծաղելի մարդու երազը», «Կովը» մուլտֆիլմերը։

2000 թվականին նրա «Ծերունին ու ծովը» մուլտֆիլմը, որն անիմացիոն ֆիլմերի պատմության մեջ IMAX մեծ ձևաչափի կինոսրահների համար ստեղծված առաջին մուլտն էր, ամերիկյան կինոակադեմիայի «Օսկար» մրցանակի արժանացավ։ --0--