Հայաստանի մշակույթի նախարարարությունն ակտիվացնում է երկրի մարզերի մշակութային կյանքը

Հայաստանի մշակույթի նախարարությունը մի շարք ծրագրեր է իրականացնում երկրում մշակույթի ապակենտրոնացման ուղղությամբ, ասաց Մշակույթի նախարարության մշակութային քաղաքականության վարչության պետ Կարո Վարդանյանը։

«Մարզերում մարդկանց համար անսովոր են դարձել մշակութային միջոցառումները։ Մարզերից մեկում երեխաները չգիտեին, թե ինչ է նշանակում տիկնիկային թատրոն»,- ուրբաթ լրագրողներին ասաց Վարդանյանը։

Նա հայտնեց, որ մարզերում մշակութային կյանքն ակտիվացնելու ուղղությամբ Մշակույթի նախարարությունը 2007 թվականից իրականացնում է «Մշակութային մարզ» ծրագիրը։

«Այս ծրագրի շրջանակներում նախատեսված են տարբեր՝ ինչպես պետական, այնպես էլ մասնավոր թատրոնների, համերգային խմբերի հյուրախաղեր»,-ավելացրեց Վարդանյանը։

Վարչության պետն ավելացրեց, որ ծրագիրը ֆինանսավորվում է պետության կողմից։

2008 թվականին «Մշակութային մարզ» ծրագիրն իրականացնելու համար պետբյուջեից տրամադրվել է 28 միլիոն դրամ՝ մոտ 91 հազար ԱՄՆ դոլար։-0-