Երևանում տեղի կունենա հայ նկարչուհի Զուլեյկա Բաժբեուկ-Մելիքյանի առաջին անհատական ցուցահանդեսը

Մարտի 25-ին Ազգային պատկերասրահում կբացվի Վրաստանում բնակվող հայ նկարչուհի Զուլեյկա Բաժբեուկ-Մելիքյանի առաջին անհատական ցուցահանդեսը, երկուշաբթի Երևանում լրագրողներին տեղեկացրեց ՀՀ մշակույթի փոխնախարար Գագիկ Գյուրջյանը։

«Նկարչուհին Վրաստանում գեղանկարչության հայկական դպրոցի վառ ներկայացուցիչն է», - ասաց Գյուրջյանը։ Նրա խոսքերով, ցուցադրության մեջ ներառվել են նկարչուհու շուրջ 50 աշխատանքներ։

Միաժամանակ Գյուրջյանն ավելացրեց, որ Երևանում Բաժբեուկ-Մելիքյանի ցուցահանդեսի անցկացումը հնարավոր է դարձել՝ մշակույթի բնագավառում հայ-վրացական համաձայնագրի շնորհիվ։

Աշխատանքների հեղինակն իր հերթին կիսվեց իր տպավորություններով պատմական հայրենիքում իր առաջին ցուցահանդեսի կապակցությամբ։

«Ես շատ ուրախ եմ ցուցադրել իմ աշխատանքները հայ այցելուներին», - ասաց նա։

Բաժբեուկ-Մելիքյանն ավելացրեց, որ նկարչի մասնագիությունն ամենաբարդ մասնագիտություններից մեկն է։

«Մանկուց իմ հայրը՝ հայտնի նկարիչ Ալեքսանդր Բաժբեուկ-Մելիքյանը խոչընդոտում էր այն բանին, որպեսզի ես գնայի իր ուղով», -  պատմեց նկարչուհին։ Սակայն նրա խոսքերով, «գեները, այնուամենայնիվ, իրենցը ասացին»։

«Ես սկսեցի նկարել, և հայրս գնահատեց իմ աշխատանքները», - ասաց նկարչուհին։

Հայ նկարչուհի Զուլեյկա Բաժբեուկ-Մելիքյանը ներկայացրել է իր աշխատանքները մի շարք երկրներում։ 1987 թ.-ին Ճապոնիան հանձնել է նրան ոսկե մեդալ՝ «Կառուսել» աշխատանքի համար։ Հայ նկարչուհու ցուցահանդեսը կտևի մինչև ապրիլի 2-ը։-0-