ԵՐԵՎԱՆ, 20 մարտի./Նովոստի-Արմենիա/. Երևանում հինգշաբթի տեղի ունեցավ National Geographic Traveler ամսագրի հայկական տարբերակի շնորհանդեսը ։
Ինչպես նշեց ամսագրի խմբագիր Սեդա Մուրադյանը, նոր հրատարակության նպատակն է՝ Հայաստանը ցույց տալ ճանապարհորդների աչքերով։ «Ամսագրի առաջին համարն անվանվում է «Չտեսնված Հայաստան», քանի որ մենք ցանկանում էին ցույց տալ մեզ շրջապատող գեղեցկությունը»,- ընդգծեց նա։
Նա վստահություն հայտնեց, որ հրատարակության գործունեության շնորհիվ ոչ միայն Հայաստանում, այլև արտասահմանում գտնվող շատ մարդկանց մոտ ցանկություն կառաջանա հայկական բնությունը տեսնել սեփական աչքերով։
Իր կողմից ամսագրի գլխավոր խմբագիր Ռուբեն Մանգասարյանը հայտնեց, որ National Geographic Traveler ամսագրի պատմության մեջ առաջին անգամ հայկական տարբերակում լինելու են նաև անգլերեն և ռուսերեն ներդիրներ։
«National Geographic Traveler ամսագրի խմբագրությունում այդպիսի պրակտիկա չի կիրառվել, բայց հաշվի առնելով այն առանձնահատկությունը, որ ամսագիրը տարածվելու է նաև հայկական սփյուռքում, որը հաճախ լավ չի խոսում արևելահայերեն, ապա կարվի բացառություն»,- նշեց նա։
Մանգասարյանի խոսքով, ամսագիրը պատմելու է նաև հայկական սփյուռքի կյանքի մասին և արտասահմանցի ընթերցողին ներկայացնելու է հայկական մշակույթի հուշարձանները։
Մանգասարյանը նաև ընդգծեց, որ առաջին անգամ Հայաստանում հրատարկվում է ողջ աշխարհում հայտնի ամսագրի արտոնված տարբերակը։
«Մենք մտադիր ենք օգտագործել բոլոր հնարավորությունները, որը մեզ կտա National Geographic-ի հետ համագործակցությունը՝ Հայաստանում զբոսաշրջությունը զարգացնելու նպատակով»,-նշեց Մանգասարյանը, ընդգծելով, որ նախատեսվում է նաև էքսկուրսիաներ կազմակերպել դեպի այն շրջանները, որոնք նկարագրվելու են ամսագրի էջերում։
National Geographic Traveler ամսագրի հայկական տարբերակը հրատարակվելու է 10 հազար օրինակ տպաքանակով։ 2008թ. ընթացքում նախատեսվում է թողարկել ամսագրի վեց համար։
National Geographic Traveler ամսագիրը հրատարակվում է 1984 թվականից, 4,7 միլիոն ընթերցող ունի ԱՄՆ-ում և ավելի քան 8 միլիոն ընթերցող ողջ աշխարհում։ Ամսագիրը աշխարհում ամենաընթերցելի հրատարակությունն է ճանապարհորդությունների մասին և նպատակ ունի ընթերցողին աշխարհը ներկայացնել ճանապարհորդի աչքերով։
National Geographic Traveler ամսագիրը հրատարկվում է նաև Չինաստանում, Իսրայելում, Սլովենիայում, Իսպանիայում, Լեհաստանում, Հունգարիայում, Լատինական Ամերիկայի որոշ երկրներում։ Հետխորհրդային տարածության երկրներից ամսագիրը հրատարակվում է Ռուսաստանում, Ուկրաինայում և Հայաստանում։--0—
