Սրբուկ. տրամադրվում եմ լավ ելույթի և չեմ ուզում հանձնվել (ՖՈՏՈ, ՎԻԴԵՈ)

ԵՐԵՎԱՆ, 17 ապրիլի. /Նովոստի-Արմենիա/. «Եվրատեսիլ 2019» երգի միջազգային մրցույթում Հայաստանը ներկայացնող Սրբուկը (Սրբուհի Սարգսյանը) ցնցող ելույթով ուրախացրել է իր հայ երկրպագուներին: 

Վառ և եռանդուն երգչուհին նախօրեին ելույթ է ունեցել աշխարհի ավելի քան 30 երկրներում գործող AGBU (The Armenian General Benevolent Union) հայկական ոչ առևտրային կազմակերպության 113-րդ տարեդարձին:

Մեկուկես ժամ «կենդանի» ձայնն իսկական նվեր էր հանդիսատեսի համար: Սրբուկը կատարեց հանրահայտ երգերի cover տարբերակը` Human Rag’N’Bone Man, Justin Timberlake Can’t stop the feeling, Monatik «Кружит» և այլն։

Բոլորովին վերջերս երգչուհին ելույթ է ունեցել Ամտերդամում` «Եվրատեսիլ 2019» պրոմո-տուրի շրջանակում:

«Կյանքում առաջին անգամ ելույթ ունեցա 7 հազար հանդիսատեսի առաջ: Հանդիսատեսից փոխանցվող մեծ էներգետիկա էի զգում: Դա շատ ուժեղ և հուզիչ էր», - ասաց Սրբուկը «Նովոստի-Արմենիա»–ի թղթակցի հետ զրույցում: 

Պրոմո տուրի շրջանակում երգչուհու հաջորդ ելույթը տեղի կունենա Իսպանիայում, ապրիլի 20-ին Սրբուկի անզուգական ձայնը կարող են ունկնդրել Մադրիդի բնակիչները:

Սրբուկը նաև պատմել է, թե ինչպես է պատրաստվում մայիսին նախատեսված «Եվրատեսիլ» մրցույթին: 

Ըստ երգչուհու, նրան ակտիվ աջակցում է ընտանիքը, մտերիմ ընկերները, նրա երաժշտությունը սիրող մարդիկ: Սրբուկը նաև նշեց հայկական սփյուռքի շատ ջերմ և սրտաբաց ընդունելությունը: Հարցին, թե հնարավո՞ր է, որ «Եվրատեսիլ 2020» կայանա Հայաստանում, երգչուհին նշեց. «Տեսնենք, ամեն ինչ կախված է ելույթից»:

Հայաստանը «Եվրատեսիլ 2019»–ում ներկայացնող Սրբուհի Սարգսյանը` Սրբուկը, ելույթ կունենա առաջին համարի ներքո մրցույթի երկրորդ կիսաեզրափակչում։ 

Սրբուկը հանդես կգա Walking Out երգով։ «Եվրատեսիլ 2019»–ի եզրափակիչը կանցկացվի մայիսի 18–ին Թել Ավիվի Ցուցահանդեսային կենտրոնում։

Բացի Հայաստանից, մայիսի 16–ին կայանալիք երկրորդ կիսաեզրափակչի առաջին կեսում ելույթ կունենան Ավստրիայի, Դանիայի, Իռլանդիայի, Մոլդովայի, Ռումինիայի, Շվեյցարիայի և Շվեդիայի ներկայացուցիչները, ինչպես նաև ավտոմատ կերպով նախնական որակավորում անցած Գերմանիայի, Իտալիայի և Մեծ Բրիտանիայի ներկայացուցիչները։-0-