ԵՐԵՎԱՆ, 29 հոկտեմբերի. /Նովոստի–Արմենիա/. Ավելի քան 400 անիմացիոն ֆիլմեր են ներկայացված Երևանում անցկացվող ReAnimania միջազգային 7–րդ անիմացիոն կինոփառատոնին, ասաց փառատոնի հիմնադիր և տնօրեն Վրեժ Քասունին։
«ReAnimania–ին մասնակցում են աշխարհի 90 երկրների ներկայացուցիչներ։ Սա ռեկորդային թիվ է փառատոնի համար։ Մրցութային և արտամրցութային ծրագրերում կներկայացվեն շուրջ 420 անիմացիոն ֆիլմեր», – նշեց Քասունին:
Նա ավելացրեց, որ փառատոնի շրջանակում կկազմակերպվեն յոթ անվճար վարպետության դասեր, որոնց կմասնակցի շուրջ 200 մարդ։
«Այս տարի մենք բացում ենք փառատոնը պատկերապատման արվեստի գրքերի ցուցահանդեսով, որոնք նվիրված են Հայոց ցեղասպանության 100–րդ տարելիցին։ Մենք ընտրել ենք հայ և օտարերկրացի հեղինակների 12 գրքեր, որոնք նվիրված են այդ իրադարձությանը», – նշեց Քասունին։
Նա նաև ընդգծեց, որ Հաայստանի ֆրանսիական համալսարանի և Ֆրանսիայի դեսպանատան հետ համագործակցության շրջանակում 18–26 տարեկան տաղանդավոր անիմատորները հնարավորություն կունենան ուսում ստանալ օտարերկրյա առաջատար բուհերում։
Քասունին նշեց, որ ReAnimania 7–րդ փառատոնն անցկացվում է «Վերածնունդ» նշանաբանի ներքո, ինչը ևս նվիրվում է Հայոց ցեղասպանության 100–րդ տարելիցին։
Փառատոնը մեկնարկել է նախօրեին ֆրանսահայ ռեժիսոր Ալեքսանդր Հեբոյանի «Մունե. լուսնի պահապանը» ֆիլմի ցուցադրությամբ։
Փառատոնի մասնակիցները կմրցեն հինգ մրցութային ծրագրերում` «Լավագույն լիամետրաժ ֆիլմ», «Լավագույն կարճամետրաժ ֆիլմ», «Լավագույն երաժշտական տեսահոլովակ», «Լավագույն հեռուստատեսային և ուսուցողական ֆիլմ» և «Լավագույն դիպլոմային ֆիլմ»։
Բացի այդ, արտամրցութային ծրագրում կներկայացվեն վավերագրական և էքսպերիմենտալ ֆիլմեր, ինչպես նաև կկազմակերպվի Հայոց ցեղասպանության 100–րդ տարելիցին նվիրված «Վերածնունդ» պատկերապատման արվեստի գրքերի ցուցահանդեսը։
ReAnimania միջազգային անիմացիոն կինոփառատոնն առաջին անգամ անցկացվել է Երևանում 2009 թվականին։ Նախագծի նպատակն անիմացիոն արվեստի օժանդակությունն է, համաշխարհային կարգի անիմատորների նոր սերնդի դաստիարակությունը և հայ անիմատորների աշխատանքների ցուցադրությունը համաշխարհային ասպարեզում, ինչպես նաև ամբողջ աշխարհից լավագույն անիմացիոն ֆիլմերի ցուցադրությունը։
ReAnimania միջազգային 7–րդ անիմացիոն կինոփառատոնն անցկացվում է Երևանում հոկտեմբերի 28–ից նոյեմբերի 3–ը։
«Նովոստի–Արմենիա» գործակալությունը փառատոնի ինֆորմացիոն հովանավորն է։–0–
