ԵՐԵՎԱՆ, 13 հուլիսի. /Նովոստի–Արմենիա/. «Ոսկե ծիրան» կինոփառատոնի շրջանակում տեղի ունեցավ Ջիվան Ավետիսյանի «Վերջին բնակիչը» ֆիլմի պրեմիերան։
Ռեժիսորը լրագրողներին պատմեց ֆիլմի հիմնական ուղերձի մասին և բացատրեց, թե ինչու է երկխոսության մեծ մասը ադրբեջաներեն։
«Վերջին բնակիչը» ֆիլմը պատմում է ադրբեջանական գյուղի վերջին բնակչի մասին, որը հայ–ադրբեջանական պատերազմից հետո ամայացել է։ Նա չի կարող հեռանալ գյուղից, քանի որ սպասում է դստերը, ով դարձել է ադրբեջանական ջարդերի վկա և հայտնվել հոգեբուժարանում։
«Ֆիլմում փորձել եմ ներկայացնել մի մարդու պատմությունը, ով, հայտնվելով եզրին, փորձում է պահպանել մարդկային արժանապատվությունը։ Գլխավորն այն է` արդյոք կարող ես մարդ մնալ, թե ոչ», – ասաց Ավետիսյանը։
Նրա խոսքով` պատերազմը միայն ֆոն է։ Նա նաև փորձել է վերջին բնակչի կերպարում ներկայացնել Երկիր մոլորակի վերջին բնակչի խորհրդանշական կերպարը։
«Այս համատեքստում շատ կարևոր է դստեր փրկությունը, քանի որ դրանով է պայմանավորված կյանքի շարունակությունը», – ասաց Ավետիսյանը։
Նա նշեց, որ Հայաստանում ֆիլմ նկարահանելը շատ ավելի դժվար է, քան ողջ աշխարհում։ Նա նաև ասաց, որ ցանկացած ֆիլմ նկարահանում է ինչպես վերջինը` խնդրելով Աստծուն իրեն ուժ տալ։
«Հպարտ եմ, քանի որ մեջքիս հետևում զգում եմ ազատ Արցախը, քարոզում եմ սեր, քանի որ ինձ հաղթող եմ զգում, չնայած ողջ մանկությունս անցկացրել եմ նկուղում ադրբեջանական գնդակոծությունների պատճառով», – ասաց Ավետիսյանը։
Նա նաև խոսեց Սերժ Թանկյանի հետ համագործակցության մասին, ով, ծանոթանալ սցենարին, առաջարկել է գրել ֆիլմի սաունդթրեքը։
«Թանկյանը ոչ միայն ֆանտաստիկ երաժիշտ է, այլ նաև հիանալի մարդ», – ասաց Ավետիսյանը։
Նա կարծում է, որ կարողացել է ուղերձը փոխանցել հանդիսատեսին, քանի որ ֆիլմն արդեն բարձր գնահատականի է արժաանցել փառատոնների շրջանակում և կինոքննադատների շրջանում։
«Ինչ վերաբերում է ֆիլմում հնչող ադրբեջաներենին, ապա պետք է նշել, որ գործողությունների մեծ մասը տեղի է ունենում Ադրբեջանում», – ասաց Ավետիսյանը։
Հիշեցնենք, որ Ջիվան Ավետիսյանը «Թևանիկ» ֆիլմի ռեժիսորն է, որն արժանացել է միջազգային փառատոնների բազմաթիվ մրցանակների։
«Ոսկե ծիրան» XIII միջազգային կինոփառատոնն անցկացվում է Երևանում հուլիսի 10–17–ը։ –0–
