Եկատերինա Վարնավան և Մաքսիմ Մարինինը հիացրել են հանդիսատեսին հայկական օրորոցայինի ներքո կատարված իրենց պարով (ՏԵՍԱՆՅՈՒԹ)
![Եկատերինա Վարնավան և Մաքսիմ Մարինինը հիացրել են հանդիսատեսին հայկական օրորոցայինի ներքո կատարված իրենց պարով (ՏԵՍԱՆՅՈՒԹ) Եկատերինա Վարնավան և Մաքսիմ Մարինինը հիացրել են հանդիսատեսին հայկական օրորոցայինի ներքո կատարված իրենց պարով (ՏԵՍԱՆՅՈՒԹ)](/upload/iblock/593/pekpuwg2lfssdzyq5p1d7vm35bw2e0i5.jpg)
ԵՐԵՎԱՆ, 20 նոյեմբերի. /Նովոստի-Արմենիա/. Եկատերինա Վարնավան և Մաքսիմ Մարինինը ռուսական Առաջին հեռուստաալիքի «Լեդնիկովի պերիոդ» նախագծում պարել են հայկական «Արի, իմ սոխակ» օրորոցայինի ներքո:
Պարային զույգը վերջում ծածանել է անմոռուկի պատկերով պաստառ (1915 թ.-ի Հայոց ցեղասպանության զոհերի հիշատակի խորհրդանիշը) և արժանացել հանդիսատեսի բուռն ծափողջույններին: Ժյուրին ելույթը բավական բարձր է գնահատել. տեխնիկայի համար շնորհել է 5,96 միավոր, արտիստիզմի համար՝ 6.0 միավոր:
Մեկնաբանելով երգի ընտրությունը՝ Մարինինը նշել է, որ նրանք ցանկանում էին հիշեցնել մարդկանց Հայոց ցեղասպանության իրադարձությունների մասին:
«Պատմության մեջ կան տարբեր պահեր, մութ պահեր, և մենք ցանկանում էինք ասել, որ մարդիկ դա չմոռանան և հիշեն: Չնայած, որ աշխարհում դա ճանաչված փաստ չէ (ցողասպանությունը), բայց այն եղել է...Սա հարգանքի տուրք էր 1915 թ.-ին անմեղ սպանվածներին», - ասել է գեղասահորդը:
Ելույթից ունեցած իր զգացումների մասին խոսել է նաև Վարնավան: «Այսօր ես զգացմունքայնորեն այնքան տարրալուծվեցի, որքան երբեք», - նշել է նա: -0-