Ցուցարարները որոշ ժամանակով փակել են Արշակունյաց պողոտան

ԵՐԵՎԱՆ, 14 ապրիլի. /Նովոստի–Արմենիա/. Երևանում բողոքի ակցիայի մասնակիցները որոշ ժամանակով փակել են Արշակունյաց պողոտան:

Ավելի վաղ ակցիայի մասնակիցները մտել են Հայաստանի Հանրային ռադիոյի շենք, բարձրացել երրորդ հարկի ստուդիական սենյակն ու ուղիղ եթեր են պահաջել: Որոշ ժամանակ անց շենքում հոսանքն անջատվել է: Դրանից հետո Փաշինյանը դիմել է Հայաստանի քաղաքացիներին` երեկոյան հանրահավաքի միանալու կոչով, և ակցիան շարունակվել է: Կրկեսի շենքի սկզբնամասում` Արշակունյաց պողոտայի սկզբում, ցուցարարները փակել են երթևեկը և նստացույց սկսել:

Նիկոլ Փաշինյանը ներողություն է խնդրել վարորդներից պատճառած անհարմարությունների համար: Այնուամենայնիվ, որոշ ժամանակ անց որոշում է կայացվել առաջ շարժվել:


Ապրիլի 9–ին տեղի ունեցավ ՀՀ չորրորդ նախագահ Արմեն Սարգսյանի երդմնակալության արարողությունը։ Նա դարձավ պետության առաջին ղեկավարը, որին ընտրեց ԱԺ–ն խորհրդարանական իշխանավարման համակարգին անցնելուց հետո։ Նույն օրը դադարեցվեցին ՀՀ նախագահ Սերժ Սարգսյանի լիազորությունները, և կառավարությունը հրաժարական տվեց։

Կառավարության ղեկավարի պաշտոնին թեկնածուների առաջադրման գործընթացը մեկնարկել է ապրիլի 9–ին և կավարտվի ապրիլի 16–ին։ Վարչապետը կընտրվի ՀՀ ԱԺ–ի կողմից ապրիլի 17–ին։

Ցուցարարները` «Ելք» ընդդիմադիր խմբակցության ղեկավար, «Քաղաքացիական պայմանագիր» կուսակցության առաջնորդ Նիկոլ Փաշինյանի գլխավորությամբ, որոնք բողոքում են վարչապետի պաշտոնին Սերժ Սարգսյանի հնարավոր առաջադրման դեմ, ուրբաթ երեկոյան փակել են Երևանի Ֆրանսիայի հրապարակի երթևեկը։ Նրանք ամբողջությամբ արգելափակել են հրապարակի բոլոր հինգ մուտքերն ու նշանակել պատասխանատուներ յուրաքանչյուր հատվածի համար։ -0-