Սիմվոլիկ ակցիա. Փաշինյանը Հանրային ռադիոյի եթերում դիմեց համաքաղաքացիներին

ԵՐԵՎԱՆ, 14 ապրիլի. /Նովոստի–Արմենիա/. «Ելք» ընդդիմադիր խմբակցության ղեկավար, «Քաղաքացիական պայմանագիր» կուսակցության առաջնորդ Նիկոլ Փաշինյանն ուղերձով դիմեց հայ ժողովրդին Հանրային ռադիոյի եթերում` կոչ անելով երեկոյան միանալ հանրահավաքի: 

Երևանում ցուցարարները քիչ առաջ ներխուժել էին Հանրային ռադիոյի շենք և ուղիղ եթեր էին պահանջում` հայտարարությամբ հանդես գալու համար:

Ուրբաթ երեկոյան շուրջօրյա ակցիա է անցկացրել Սերժ Սարգսյանի հնարավոր վարչապետության դեմ: Ակցիայի մասնակիցները փակել են երթևեկությունը Ֆրանսիայի հրապարակում` ամբողջովին արգելափակելով բոլոր հինգ մուտքերը դեպի հրապարակ: Ակցիան շարունակվում է արդեն մոտ 19 ժամ:


«Կոչ ենք անում այսօր ժամը 18:30-ին հավաքվել Ֆրանսիայի հրապարակում՝ տեր կանգնելու ձեզ պատկանող իշխանությանը, ձեզ պատկանող իրավունքին, ձեզ պատկանող հաղթանակին»:

Գրեթե երկու ժամ ցուցարարները մնացին Հանրային ռադիոյի շենքում: Այս սիմվոլիկ ակցիայից հետո ցուցարարները կրկին դուրս եկան և, կարծես, շարժվում են Ֆրանսիայի հրապարակ և շարունակեցին բողոքի ակցիան: -0-