Տեսականորեն Պերմյակովը կարող է ուղարկվել ՌԴ. փաստաբան

ԵՐԵՎԱՆ, 2 մայիսի. /Նովոստի–Արմենիա/. Գյումրում Ավետիսյանների ընտանիքին սպանած Վալերի Պերմյակովը կարող է պատիժը կրել Ռուսաստանում, հայտնում է azatutyun.am–ն Ինտերֆաքսի հղումով։ 

Ինչպես հաղորդում է ռուսական գործակալությունը, Հայաստանի արդարադատության նախարարությունն այժմ քննարկում է ցմահ ազատազրկման դատապարտված Վալերի Պերմյակովի պատիժը կրելու վայրի հարցը:


«Պերմյակովը դատապարտվել է թե՛ հայաստանյան, թե՛ ռուսաստանյան դատարանի կողմից: Ներկայում քննարկվում է պատիժը կրելու վայրի կազմակերպման հարցը»,- «Ինտերֆաքս»-ին հայտնել են Հայաստանի ադարադատության նախարարությունից:

Ռուսական գործակալությունը մեջբերում է Պերմյակովի փաստաբան Էդուարդ Աղաջանյանի հետևյալ խոսքերը․ «Տեսականորեն Պերմյակովը կարող է ուղարկվել Ռուսաստան»:

Միևնույն ժամանակ, ինչպես նշում է «Ինտերֆաքս»-ը, ՀՀ արդարադատության նախարարությունը հերքել է մի շարք ԶԼՄ-ների տեղեկություններն այն մասին, թե Պերմյակովին կարող են փոխանակել Ռուսաստանում խոշոր ավտովթարի գործով մեղավոր ճանաչված ՀՀ քաղաքացի Հրաչյա Հարությունյանի հետ:

2016 թվականի օգոստոսի 23–ին Հայաստանի դատարանը դատապարտել է Վ.Պերմյակովին ցմահ ազատազրկման Գյումրիում 2015 թվականի հունվարի 12–ին Ավետիսյան ընտանիքին սպանելու համար։ -0-