Հայաստանը կարող է, բայց պարտավոր չէ Պերմյակովին հանձնել Ռուսաստանին. փաստաբան

ԵՐԵՎԱՆ, 23 օգոստոսի. /Նովոստի-Արմենիա/. Հայաստանի իշխանությունները կարող են, բայց պարտավոր չեն Ռուսաստանին հանձնել Գյումրիում ընտանիքի սպանության համար ցմահ ազատազրկման դատապարտված զինծառայող Վալերի Պերմյակովին, ՌԻԱ Նովոստիին է հայտնել փաստաբան Ռուսլան Զակալյուժնին:

Երեքշաբթի նիստի ժամանակ Շիրակի մարզի ընդհանուր իրավասության դատարանը մեղադրանքի բոլոր կետերով մեղավոր ճանաչեց 102–րդ ռուսական ռազմակայանի զինծառայող Վալերի Պերմյակովին:

2015 թ.-ի հունվարի 12-ին Գյումրիում Ավետիսյանների ընտանիքի յոթ անդամների սպանության մեղադրանքով Պերմյակովը դատապարտվեց զմահ ազատազրկման («Երկու կամ ավելի անձանց սպանություն` կատարված առանձնակի դաժանությամբ և զուգորդված ավազակային հարձակմամբ»):

«Ռուսաստանի և Հայաստանի Հանրապետության միջև առկա է ռուսական ռազմակայանի 1995 թ.-ի պայմանագիրը, ինչպես նաև Հայաստանի տարածքում ռուսական ռազմակայանի տեղակայման հետ կապված հարցերում փոխադարձ իրավական օգնության և իրավաբանական հարցերի շուրջ կնքված համաձայնագիրը: Այդ համաձայնագրի համաձայն, Հայաստանի տարածքում ռուսական ռազմակայանի կազմի մեջ մտնող անձանց և նրանց ընտանիքների կողմից կատարված հանցագործությունների և այլ իրավախախտումների գործերը քննվում են ՀՀ օրենսդրությամբ: Հետևաբար, Հայաստանի իշխանությունները պարտավոր չեն պատիժը կրելու համար Պերմյակովին հանձնել Ռուսաստանին», - նշել է փաստաբանը:

Զակալյուժնին նաև նշել է, որ Հայաստանը 1994 թ.-ին վավերացրել է «Քաղաքացիական, ընտանեկան և քրեական գործերին առնչվող իրավական օգնության և իրավական հարաբերությունների կոնվենցիան», որի համաձայն, հանձնումը կարող է նաև մերժվել, եթե հանցագործությունը, որի հետ կապված պահանջվում է հանձնումը, տեղի է ունեցել մյուս կողմի տարածքում:

«Հետևաբար, Հայաստանի իշխանությունները իրավունք ունեն դատավճռի իրականացման համար Պերմյակովին հանձնել Ռուսաստանին, սակայն պարտավոր չեն», - ավելացրել է Զակալյուժնին` նշելով, որ հանձնման հավանականություն կա, սակայն որքանով է դա հնարավոր, դժվարացել է պատասխանել:

Գյումրիում 2015 թվականի հունվարի 12–ին սպանվել է յոթ մարդուց բաղկացած ընտանիք, այդ թվում` երկու մանկահասակ երեխաներ։ Հանցագործության կատարման մեջ մեղադրվում է Գյումրու 102–րդ ռուսական ռազմակայանի զինծառայող Վալերի Պերմյակովը, ով 2015 թ.–ի հունվարի 13–ին ձերբակալվել է ռուս սահմանապահների կողմից հայ–թուրքական սահմանը հատելու փորձի ժամանակ և խոստովանել է իր մեղքը։

2015 թ.-ի օգոստոսին կայացած դասալքության գործով դատական գործընթացի ժամանակ Պերմյակովը խոստովանեց իր մեղքը և հայտնեց, որ զղջում է, սակայն հրաժարվեց դատավարության ժամանակ ցուցմունք տալ: Ռուսական կայազորային ռազմական դատարանը դատապարտեց նրան 10 տարվա ազատազրկման խիստ ռեժիմի գաղութում` դասալքության և զենքի հափշտակության համար:

Հայաստանի քննչական կոմիտեն 2015 թվականի հոկտեմբերի 16–ին Պերմյակովին նոր մեղադրանքներ է առաջադրել։ Քննության տվյալներով, սպանությունն ուղեկցվել է ավազակային հարձակմամբ, անօրինական տուն ներխուժելու և գույքի հափշտակության հետ, ինչից հետո կատարվել է սահմանն ապօրինի հատելու փորձ։ Պերմյակովին, բացի սպանության մեղադրանքից, մեղադրանքներ են առաջադրվել «ավազակային հարձակում», «անօրինական ներխուժում», «կողոպուտ», «պետական սահմանի հատման փորձ» հոդվածներով։ Նա ընդունել է իրեն առաջադրած բոլոր մեղադրանքները։ -0-