«Ադրբեջանական ավիաուղիները» ինքնաթիռ չի թողել հայկական ազգանուն ունեցող ՌԴ քաղաքացուն

ԵՐԵՎԱՆ, 31 հոկտեմբերի. /Նովոստի-Արմենիա/. ՌԴ քաղաքացի Սերգեյ Գյուրջյանին Դոմոդեդովո օդանավակայանում չի թույլատրվել մուտք գործել «Ադրբեջանական ավիաուղիների» ինքնաթիռ: Նրան հասկացրել են, որ դրա պատճառը հայկական ազգանունն է, և այժն նա չի բացառում, որ կդիմի դատարան, գրում է «Կոմերսանտը»:

Ըստ թերթի՝ իրավապաշտպանները նշում են, որ ՌԴ՝ հայկական ազգանունով քաղաքացիների մուտքը Ադրբեջան արգելելը «կանոններից շեղում չէ, այլ միտում»: «Սակայն տվյալ պահին միջադեպը հասել է մինչև ՌԴ նախագահի աշխատակազմ, որտեղ այն որակել են որպես «բեսպրեդել», նշում է թերթը»:

Թերթը նշում է, որ Սերգեյ Գյուրջյանը, ով «ԱվտոՎԱԶ» ՍՊԸ-ի արտահանման վաճառքների վարչության պետն է, պետք է Մոսկվայից մեկներ Բաքու՝ Lada ավտոսրահի բացմանը մասնակցելու նպատակով: Պրն. Գյուրջյանն իր բլոգում գրել է, որ հոկտեմբերի 27-ի երեկոյան եկել է Դոմոդեդովո և փորձել է «Ադրբեջանական ավիաուղիների» J2 853 չվերթի հաշվառում անցնել: Սակայն նրան մերժել են: Օդանավակայանի աշխատակցուհին, իսկ հետո նաև «Ադրբեջանական ավիաուղիների» ներկայացուցիչը բացատրել են, որ «ղեկավարությունը հանձնարարել է չհաշվառել հայկական ազգանուն ունեցող մարդկանց»: Այս հարցում չի օգնել նաև այն, որ պրն. Գյուրջյանը ՌԴ քաղաքացու անձնագիր է ներկայացրել և բացատրել է, որ ծնվել և գրեթե ողջ կյանքն ապրել է Մոսկվայում:

Թերթը գրում է, որ Մոսկվայում «Ադրբեջանական ավիաուղիների» ներկայացուցիչներին բացատրելու փորձերը, որ տեղի ունեցածը ռասսայական խտրականություն է, հանգեցրեցին միայն նրան, որ պրն. Գյուրջյանի հետ միասին չվերթից հանվեց նաև նրան ուղեկցող Դմիտրի Շումախերը, ով «ԱվտոՎԱԶ»-ի դուստր ձեռնարկության ղեկավարներից մեկն է:

«Ադրբեջանական ավիաղիներում» երեկ միջադեպը չեն մեկնաբանել: Ավելի վաղ ընկերությունը հղում էր արել տեղափոխման կանոնների կետին, որտեղ ասվում է, որ փոխադրողն իրավունք ունի ուղևորին չթույլատերլ մասնակցել թռիչքին՝ առանց պատճառը նշելու: ԱվտոՎԱԶ-ի լրատվական ծառայությունից հայտարարեցին, որ չեն մեկնաբանի իրավիճակը:

«Ավիաընկերությունն իրավունք ունի ինքնաթիռ չթողնել այն քաղաքացիներին, որոնք կարող են վտանգ ներկայացնել թռիչքի անվտանգությանը»,- ասում է «Ավիապորտ» գործակալության վերլուծական ծառայության ղեկավար Օլեգ Պանտելևը: - Եթե չթույլատրելը կապված է միայն ազգանվան հետ, ապա այստեղ որոշակի դատական հեռանկարներ կան»:--0--