Հայոց ցեղասպանության զոհերի հիշատակին նվիրված մի շարք միջոցառումներ կանցկացվեն Մոսկվայում, «Նովոստի-Արմենիա» գործակալությանը հայտնեցին Ռուսաստանի հայերի միությունից (ՌՀՄ)։
Մասնավորապես, շաբաթ՝ ապրիլի 23-ին, ծրագրվում է արտոնված պիկետ անցկացնել Ռուսաստանում Թուրքիայի դեսպանության շենքի մոտ։
«Պիկետը կազմակերպված է Ռուսաստանի հայերի միության և Ռուս-հայկական համագործակցության կողմից։ Պիկետի նպատակն է պաշտոնական Թուրքիայի կողմից ավելի քան 1,5 մլն կյանքեր խլած Հայոց ցեղասպանության ճանաչման պահանջը։ Մասնակիցների կազմը սահմանափակ է և սահմանված ըստ ցուցակի»,- ասվում է հաղորդագրությունում։
Ռուսաստանի Պետական դուման դատապարտել է Թուրքիայում Հայոց ցեղասպանությունը 1995 թվականի հատուկ հայտարարությամբ, որում նշվում էր, որ «եղբայրական հայ ժողովրդի ոչնչացումը նրա պատմական Հայրենիքում իրականացվել է Ռուսաստանի փլուզման համար պայմանների ստեղծման նպատակով»։
Նույն օրը Մոսկվայի հայկական թատրոնը Ս.Ստեփանյանի ղեկավարությամբ կներկայացնի Ա.Ալֆյորովի «Լույս Մարի. Ձոն ուրախության»։
Կիրակի՝ ապրիլի 24-ին, Հայ Առաքելական Եկեղեցու Նոր Նախիջևանի և Ռուսաստանի թեմերի նախաձեռնությամբ ծաղիկներ կդրվեն Հիշատակի Խաչքարին, և տեղի կունենա հոգեհանգստի կարգ Հայկական գերեզմանոցում գտնվող Սուրբ Հարություն տաճարում։
Նույն օրը ՌԴ մայրաքաղաքի մի շարք կինոթատրոններում կկայանա Անրի Վեռնոյի «Մայրիկ» ֆիլմի ցուցադրությունը։ Մուտքն անվճար է։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
