Ուկրաինայի նախագահին դիմել են Հայ ժողովրդի ցեղասպանության հիշատակի օրը ամրագրելու խնդրանքով
ԵՐԵՎԱՆ, 13 ապրիլի. /Նովոստի-Արմենիա/. Ուկրաինայի հայ երիտասարդների ասոցիացիան դիմել է Ուկրաինայի նախագահ Վիկտոր Յանուկովիչին՝ խնդրելով նրան օրենսդրական մակարդակով ապրիլի 24-ը ճանաչել Հայոց ցեղասպանության զոհերի հիշատակի օր, հաղորդում է Analitika.at.ua կայքը:
«Մենք հուսով ենք, որ Ուկրաինայի նախագահը մեզ կլսի», - ասել է հրատարակությանը Ուկրաինայի հայ երիտասարդների ասոցիացիայի առաջնորդ Դավիթ Մկրտչյանը:
Նրա խոսքերով՝ Հայոց ցեղասպանության փաստը դատապարտվել և ճանաչվել է աշխարհի բազմաթիվ երկրների, այդ թվում նաև՝ Ռուսաստանի, ԱՄՆ-ի, Կանադայի, Ֆրանսիայի, Բելգիայի և այլ երկրների կողմից, սակայն Ուկրաինան մինչև հիմա չի որոշել իր վերաբերմունքն այս միջազգային հանցագործության նկատմամբ:
2010 թ.-ի ապրիլի 23-ին ուկրաինացի հայտնի քաղաքագետներ, գիտնականներ, հասարակական և քաղաքական գործիչներ, ինչպես նաև Ուկրաինայի մի շարք ազգային համայնքների ներկայացուցիչներ դիմել են Ուկրաինայի նախագահին և խորհրդարանին՝ կոչ անելով օրենսդրական մակարդակով ճանաչել Հայոց ցեղասպանությունը:
Նման խնդրանքներով են դիմել նաև Կիևի Գոլոսևսկի շրջխորհուրդը, Խարկովի շրջանի Իզմյուսկի քաղխորհուրդը, Չերկասսկի քաղխորհուրդը, ինչպես նաև Կիևի խորհուրդը:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ։ Առաջինը 1965 թ.-ին ճանաչել է Ուրուգվայը, որի օրինակին են հետևել Ռուսաստանը, Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, ԱՄՆ-ի 42 նահանգները։ Հայոց ցեղասպանությունը ճանաչել են նաև Վատիկանը, Եվրախորհրդարանը, Եկեղեցիների համաշխարհային խորհուրդը։-0-
