ԵՐԵՎԱՆ, 1 մարտի. /Նովոստի-Արմենիա/. Մոսկվայի հայկական համայնքի ներկայացուցիչները ծաղիկներ են դրել Ադրբեջանում հայերի ցեղասպանության զոհերի հիշատակի Սուբ Հարություն խաչքարին, հաղորդում է Ռուսաստանի հայերի միության մամուլի ծառայությունը։
«Նորագույն պատմության մեջ ադրբեջանահայերի ցեղասպանությունը սկսվել է Սումգայիթի ջարդերից 1988 թվականին։ Անմեղ զոհերի հիշատակին Մոսկվայում ծաղիկներ են դրվել Սուրբ Հարություն եկեղեցու Հիշատակի խաչքարին»,- ասվում է հաղորդագրությունում։
Արարողությանը մասնակցել են Հայ Առաքելական Եկեղեցու Նոր Նախիջևանի և Ռուսաստանի թեմի առաջնորդ Եզրաս եպիսկոպոս Ներսիսյանը, Լեռնային Ղարաբաղի Հանրապետության վարչապետ Արա Հարությունյանը, Ռուսաստանի Դաշնությունում ՀՀ Արտակարգ և Լիազոր դեսպան Օլեգ Եսայանը, Մոսկվայի հայկական համայնքի ներկայացուցիչներ։
Ռուսաստանի հայերի միության պատվիրակությունը գլխավորում էր ՌՀՄ փոխնախագահ Գեորգի Տեր-Ղազարյանցը։
Ծաղկեպսակ է դրել նաև ՌՀՄ-ՄՔԲ «Մալիշկա» Ասոցիացիայի պատվիրակությունը՝ նախագահ Սամվել Սարգսյանի գլխավորությամբ։
Ծաղկեպսակներ դնելուց հետո կայացել է Եզրաս եպիսկոպոսի աղոթքն ու կարճ քարոզը, որում նա ընդգծել է, որ 20-րդ դարում հայերի նկատմամբ իրականացված ցեղասպանության բազմաթիվ ակտերը չկարողացան և չկոտրեղին մեր քրիստոնյա ժողովրդի հոգին և արարման ձգտումը։
Այնուհետև խոսքով հանդես եկավ դեսպան Օլեգ Եսայանը։ Խոսքում նա հաստատեց Հայաստանի հակվածությունը ղարաբաղյան հակամարտության խաղաղ կարգավորմանը ԵԱՀԿ Մինսկի խմբի ձևաչափի շրջանակներում տարվող բանակցությունների միջոցով և վստահություն հայտնեց, որ Սումգայիթում և Ադրբեջանի այլ վայրերում հայերի նկատմամբ ցեղասպանության ակտերի կազմակերպիչներն ու իրականացնողները արժանի պատասխանատվություն կկրեն։ Իր խոսքը դեսպանն ավարտեց հետևյալ խոսքերով. «Որքան էլ գիշերը խավար լինի, միևնույն է, առավոտը կբացվի և անխուսափելիորեն պարզություն կմտցվի այս հարցում»։ --0--
